Шағандықтар енді отын жағып, күл шығаратын бейнеттен арылды. Көгілдір отын көңілді жылытып, табиғи газдың игілігін көруде. Бүгін облыс әкімі Нұрлыбек Нәлібаев Сырдария ауданының Шаған ауылына табиғи газ қосу рәсіміне қатысты. Салтанатты басқосуға құқық қорғау органдарының, жауапты департамент, басқармалардың басшылары, зиялы қауым өкілдері мен ауыл тұрғындары жиналды.
Аймақ басшысы өңірдің әлеуметтік-экономикалық дамуындағы жетістіктерді атап өтіп, шағандықтарды құттықтады.
– Жақында Мемлекет басшысы Қасым-Жомарт Кемелұлы Сыр өңіріне арнайы жұмыс сапарымен келгенде әлеуметтік нысандар мен өндіріс орындарында болды. Сапар кезінде Сыр өңірінің әлеуметтік-экономикалық дамуы, инвестициялық жобаларды жүзеге асыру барысын баяндадым.
Президент Астана мен Алматы қалаларындағыдай тәулік бойы қызмет көрсететін үшінші президенттік кітапхана Қызылордада ашылатынын жеткізді. Бұл бастаманы жерлестеріміз зор қуанышпен қабылдауда. Мемлекет басшысы алға қойған жоспарларды уақытылы әрі сапалы іске асырудың маңызын атап өтті. Аймақта инвестициялық климатты жақсарту, бизнес жүргізу үшін қолайлы жағдай жасау бағытындағы жұмыстарды жалғастыруды тапсырды. Президенттің Сыр өңірінің даму қарқынына, атқарылған жұмыстарға берген оң бағасы бәріміз үшін зор мәртебе.
Биыл өңірдің негізгі макроэкономикалық көрсеткіштерінің өсімі қамтамасыз етілді. Жалпы өңірлік өнім көлемі 3 трлн теңгеден асады. Соңғы үш жылда өңір экономикасына 1 триллион 600 млрд теңге құйылса, осы жылы 720 млрд теңгеден астам инвестиция тартылады. 2025-2028 жылдары 2 трлн теңгеден астам қаржыға 90 инвестициялық жоба жүзеге асырылып, 11 мыңнан аса жаңа жұмыс орны ашылады.
Президенттің, Үкіметтің ерекше қолдауымен облысымыздың бюджеті 851 млрд 300 млн теңгеге жетіп, 2022 жылдан бері 233 пайызға өсті. Оның 56 пайызы әлеуметтік салаға бағытталды.
Баршаңызды Шаған ауылына табиғи газ қосылуымен құттықтаймын! Бұл – бәріміздің ортақ қуанышымыз! «Көгілдір отын» тұрмыс-тіршілігіміздің тынысын ашып, отбасының жылуын, Отанымыздың қуатын арттыра берсін!, – деді Н.Нәлібаев.
Айгүл Есқанатованың Шаған ауылына келін болып түскеніне 30 жыл болыпты. Сол уақыттан бері елді мекеннің дамып, көз ілеспес жылдамдықпен өзгеріп келе жатқанын айтады. Ауылдың қуанышына ортақтасып келген аймақ басшысы табалдырықтан аттап, үйдегі кемеңгердің батасын алды. Кішкентай бөбектің тұсауын кесті. Осы қуаныштың барлығы шаңырақтың келінінің төбесін көкке жеткізгендей еді.
– Қазақта «би бол, би болмасаң, би түсетін үй бол» деген жақсы сөз бар. Облыс әкімі келіп, табалдырықтан аттағанының өзі қуаныш. Кішкентай бөбегіміздің тұсауын кестік. Ауылдың табиғи отынға қосылғанына қуаныштымыз. Баяғыдай арқалап отын тасымаймыз, қып-қызыл шығын болып, көмір сатып алмаймыз. Отын жарып, күл шығармаймыз. Өркениетті елміз ғой, сол өркениеттің игілігін көргеніміз үшін де бақыттымыз, – дейді Айгүл Есқанатова.
Бүгін тек Айгүл ғана емес, елді мекеннің әрбір тұрғынының жүзінен қуанышты аңғаруға болады. Қиын күндердің артта қалып, әрі үнем, әрі жұмысы жеңіл болатын «көгілдір отын» көңілді жылытып отыр.
Сондай-ақ, жиында ауданның әлеуметтік-экономикалық дамуына тынымсыз еңбегімен үлес қосқан ардагерлер мен газдандыру жұмыстарын жүргізген мердігер мекеме қызметкерлері облыс әкімінің Алғыс хатымен марапатталды. Қоғам қайраткері Әріп Хожбанов жиналған қауымға бата берді.
Аймақ басшысы газ қосу рәсімінен кейін ауыл тұрғындарымен кездесіп, ой-пікір алмасты, өтініш-тілектерін тыңдады. Облыс аумағында атқарылған, қолға алынған, жоспарланған жұмыстардың бағыты туралы айтты.
«QYRDAN – ақпарат»
Фото: Қызылорда облысы әкімінің баспасөз қызметі