Спорттың қай түрі болса да, адамның сергек көзқарасын қалыптастырады. Спортшыға тән қасиеттердің қатарында табандылық, жеңіске ұмтылыс, жылдам әрекет ету тәрізді ерекшеліктер болады. Мұндай ерекшеліктер адамның жеке өмірінде де жылдам әрі дұрыс шешім қабылдауына атсалыспақ. Менің тәжірибемде волейбол ойынының пайдасы көп болды.

Топпен ойналатын әрбір ойын тәрізді волейбол да ауызбіршілікті, топпен жұмыс істеуді, тек өзіңді ғана емес, көпті ойлауға баулиды. Тобыңның намысын қорғап, сол жолда тер төгуге үйренесің. 1964 жылдан бері Олимпиада ойындарының қатарынан орын алған бұл спорт өзінің қарапайымдығымен де ерекше. Арнайы орындарды қажет етпейді, бар болғаны доп пен екі топтың арасын бөлетін тор болса жеткілікті. Мұны бұқаралық спорттың түрі деп те қарауға болады. Өйткені, осы ретте аулаларда өзара бірігіп, ойнап жатқан немесе демалысқа барғанда уақытты көңілді өткізіп жүрген жандардың арасында волейболдың кең тарағанын көруге болады.

Волейбол ойынының жағажайда, қарда ойналатын түрлері мен пионербол, саябақтағы волейбол және отырып ойнайтын түрлері бар. Отырып ойнауды паралимпийадалық түрге жатқызамыз.

Балаларды волейболға баулу мақсатында біз көптеген әдіс-тәсілді меңгердік. Қазір оның әрбірі жемісті нәтиже беруде. Өзім ұстаздар арасындағы қалалық волейбол ойындарының жеңімпазымын. Ал шәкірттерім «Шұбар доп» оқушылар спартакиадасында І орынды қанжығаға байлады. Әлбетте, мұнан өзге де жетістіктер жетерлік.

Алдағы уақытта да балалардың спортқа қызығушылығының артуына, салауатты өмір салтын ұстанып, дені сау болып өсуіне атсалысу – менің қоғам алдындағы, мамандығымның алдындағы да парызым болып қала бермек.

Әділет Беделбеков,
«Baiterek School» жеке мектебі жанындағы
облыстық «Daryndy» балаларға арналған мектеп-интернатының
дене шынықтыру пәнінің мұғалімі