Қармақшы ауданының орталық алаңында «Жарқыра шаттық шыршасы» атты жаңа жылдық бас шыршаның шамын жағу рәсімі өтті. Көпшілік асыға күтетін мерекелік шараға аудан тұрғындары мен қонақтары жиналып, көтеріңкі көңіл-күйге бөленді.

Салтанатты іс-шараға аудан әкімі Жандос Еркінбек қатысып, жиналған жұртшылықты келе жатқан Жаңа жылмен құттықтап, ауданның әлеуметтік-экономикалық дамуындағы жетістіктерге тоқталды.

– Санаулы күндерден кейін ескі жылмен қоштасып, жаңа жылға қадам басамыз. Бұл – әрбір адам ерекше көңіл-күймен қарсы алатын айрықша сәт. Биыл ауданымыз үшін толайым табысқа толы, жемісті жыл болды. Бүгінгі жеткен жетістіктер – Мемлекет басшысы мен Үкіметтің, сондай-ақ облыс әкімінің ерекше қолдауымен қатар, тұрғындардың қажырлы еңбегінің жемісі, – деді аудан әкімі.

Сонымен қатар Жандос Еркінбек 2025 жылы ауданның бастапқы бюджеті 12 млрд 176 млн теңге көлемінде бекітіліп, жыл ішінде үш мәрте нақтылау жүргізілуі нәтижесінде аудан бюджеті 22 млрд теңгеге дейін ұлғайып отқанын атап өтті. Қазіргі таңда қаражатты тиімді жоспарлау мен қосымша қаржы көздерін тарту арқылы аудан бюджеті 9,9 млрд теңгеге, яғни 80,9 пайызға артқанын жеткізді.

– Қадірлі жерлестер! Алдағы жыл ауданымыз үшін жаңа міндеттер мен мүмкіндіктер кезеңі болмақ. Біз әлеуметтік және инфрақұрылымдық жобаларды, сондай-ақ тұрғындардың өмір сапасын арттыру бағытындағы жұмыстарды жүйелі түрде жалғастыра береміз, – деп сөзін түйіндеді аудан басшысы.

Мұнан соң аудан әкімі және ауданымыздың үздік атанып жүрген озаттарының қатысуымен, жылқы жылына жалғасар тұстағы шыршаның алғашқы шамын жағу рәсімі өткізілді. Мерекелік кеш аудан өнерпаздарының концерттік бағдарламасына ұласып, шараға жиналған жұртшылыққа ерекше көңіл-күй сыйлады.