Қызылорда қаласындағы 67 кәріз сорғы станциясының 30-ы қайта жаңғыртуды қажет етеді. Бүгінде 10 станцияны қайта жаңғырту үшін жоба-сметалық құжаттары дайындалып, қаржыландырылуға берілген. Қала әкімі Нұржан Ахатов «Су жүйесі» мекемесіне қарасты бірқатар кәріздік насос станцияларын аралап, ондағы жағдаймен танысты.

Жөндеуді қажет ететін «Шанхай», «Мерей», «Ақмешіт» мөлтек аудандары мен Сұлтан Бейбарыс көшесінде орналасқан кәріз сорғы станцияларының қазіргі жай-күйін бақылап, сала басшысына кәріз жүйелерімен қамтамасыз етуге қатысты нақты талаптар қойған шаһар басшысы елдің тұрмысына қатысты тақырыпты кейінге қалдырмау керегін нықтап айтты.

– Кәріздік насос жүйесінің қалыпты қызметі – бұл тек техникалық міндет емес, ол қала тұрғындарының өмір сүру сапасын арттыруды көздейді. Сондай-ақ, қаланың экологиялық қауіпсіздігі мен санитарлық жағдайын қамтамасыз етіп келеді. Сондықтан жұмысты жоспарға сай, уақытылы жасау қажет, – деді Нұржан Сәбитұлы.