Бүгінде елдегі еңбеккерлерге беріліп отырған мүмкіндік көп. Біріне техникадан, тағы біріне тұқымнан, енді біріне арнаулы құрал-жабдықтарынан көмек болады. Мұның барлығын шаруалар білуі керек. Сырдария ауданының әкімі Берік Сәрменбаевтың төрағалығымен өткен ауыл шаруашылығы тақырыбындағы мәжілісте ауыл шаруашылығы тауарын өндірушілерге беріліп отырған мүмкіндіктер кеңінен насихатталды.

 Мәжілісте ауыл шаруашылығы тауарын өндірушілеріне 2025 жылы мемлекеттік қолдау бағдарламалары бойынша жұмысшы тобы түсіндірме жұмыстарын жүргізді. Жиынға облыстық ауыл шарушылығы және жер қатынастары басқармасының басшысы, топ жетекшісі Талғат Дүйсебаев, «ҚазАгроҚаржы» акционерлік қоғамының облыстық филиалының басшысы Ораз Қарақожаев, «Қызылорда өңірлік инвестициялық орталығы» микроқаржылық ұйымының басшысы Талғат Матаев және салаға қатысты тиісті басқармалар мен департаменттердің өкілдері, мекеме басшылары, кент және ауылдық округ әкімдері, аудандағы ауыл шаруашылығы тауарларын өндіретін кәсіпкерлер мен шаруашылық төрағалары қатысты.

– Өткен жылы мемлекеттік және өңірлік бағдарламалар аясында ауданда құны 5,9 млрд теңгені құрайтын 327 жобаға қаржылай қолдау көрсетілді. «ҚазАгроҚаржы» акционерлік қоғамының Қызылорда филиалы арқылы 25 ауыл шаруашылығы техникалары мен құрал-жабдықтары алынды. «Аграрлық несие корпорациясы» акционерлік қоғамы арқылы 72 жоба қаржыландырылды. «Өңірлік инвестициялық орталығы» арқылы «Ауыл шаруашылығы өнімдерін өңдеу» пилоттық жобасы негізінде 3 жоба қаржылай қолдау тапты. Президент бастамасымен қолға алынған «Ауыл аманаты» жобасы аясында 13 жоба жүзеге асырылды. Бұл бағыттағы жұмыстар биыл да жалғасын табады, – деді аудан әкімі Берік Сәрменбаев.