Айласын асырып, ақша жымқырғандар қайтер екен? Елде енді жемқорлардың тізімі шығатын арнайы реестр құрылуы мүмкін. Бұл туралы Сыбайлас жемқорлыққа қарсы іс-қимыл агенттігі төрағасының бірінші орынбасары Ұлан Сарқұлов айтты.

Мәжіліс депутаттары «Қазақстан Республикасының кейбір заңнамалық актілеріне сыбайлас жемқорлыққа қарсы іс-қимыл мәселелері бойынша өзгерістер мен толықтырулар енгізу туралы» заң жобасын бірінші оқылымда қарады. Біз айтып отырған мәселе де сонда айтылған.

– Бұл мәселеде басқа мемлекеттік органдармен жан-жақты жұмыс істедік. Бұл тізімді жасауда ешқандай шығынға ұшырамаймыз. Ауыр және аса ауыр сыбайлас жемқорлық қылмысын жасаған адамдар туралы ғана мәліметтер енгізіледі. Біз «Ұят болады» дейміз, сол ұят болмас үшін олар осы тізімде болады, – деді Ұ.Сарқұлов.

Оның айтуынша, тізімге заң күшіне енгеннен кейін сыбайлас жемқорлық қылмысы үшін сотталғандар ғана кіреді. Ал тізімнен ақтау үкімі заңды күшіне енген соң және соттылықты толық өтеген соң ғана шығарылады екен.

Махаббат САБЫРЖАН