Сырдария ауданының әкімі Берік Сәрменбаев аудандық мәслихат төрағасы Ержан Әжікенов және аудандық мәслихат депутаты Алмас Есназармен бірге аудандық әуез мектебінің жұмысымен танысты.

Аудан басшысы ғимараттың жай-күйін, оқу кабинеттерінің жабдықталуын, үйірмелердің жұмыс барысын және жылу қазандығының жұмысын көрді.

– Мемлекет басшысы Қасым-Жомарт Кемелұлы өнер мен мәдениет саласын дамытуға ерекше көңіл бөліп келеді. Осыған байланысты аймақ басшысы Нұрлыбек Машбекұлы Нәлібаевтың қолдауымен көптеген мәдени нысандар бой көтерді. Бұл бағыттағы жұмыстар ауданымызда да жалғасын тауып, рухани орталықтар ашылды. Оқушылардың шығармашылық әлеуетін арттыру, үйірмелердің сапалы жұмысын қамтамасыз ету және қосымша білім беру бағыттарын кеңейту – өнер мен мәдениетті дамыту жас ұрпақ тәрбиесінің маңызды бөлігі. Ұлттық мәдениетті дәріптеу және талантты оқушыларды қолдау – біздің басты міндетіміз. Осы бағыттағы жұмыстар жүйелі түрде жүргізілуі қажет, – деді Берік Әбдіғаппарұлы.

Бүгінде әуез мектебінде скрипка, вокал, үрмелі аспаптар, дәстүрлі ән, фортепиано, хореография, баян, қобыз, домбыра бағыттары бойынша үйірмелер жұмыс істейді. Аталған үйірмелерде 260 бала қамтылып, өнердің түрлі салаларында шығармашылық қабілеттерін дамытуда. Оларға 20 ұстаз сабақ беріп келеді.

Аудан әкімі білім мен мәдениет саласының қоғамдағы маңызын атап өтіп, аталған саладағы жұмыстарды одан әрі жетілдіру қажеттігін айтып, сала басшыларына нақты тапсырмалар жүктеді.