Аймақ басшысы Нұрлыбек Машбекұлы Нәлібаевтың тапсырмасына сәйкес, бүгін Сырдария ауданының әкімі Берік Сәрменбаев аудандық мәслихат төрағасы Ержан Әжікенов және “АМАНАТ” партиясы аудандық филиалының атқарушы хатшысы Ақтөре Ибрагимұлымен бірге Қоғалыкөл ауылындағы әлеуметтік нысандарды аралады. Жұмыс сапары барысында білім беру, денсаулық сақтау, мектепке дейінгі тәрбие және мәдениет мекемелерінің жай-күйін көрді.

Атап айтқанда, №44 орта мектептің оқу кабинеттерінің жабдықталуы, жылу жүйесінің жай-күйі, оқушылардың қауіпсіздігі назарға алынды. Білім беру ұйымы басшылығына оқу процесін жақсарту, материалдық-техникалық базаны кезең-кезеңімен жаңарту бойынша нақты тапсырмалар берді.

Сондай-ақ ауылдық амбулаторияға барып, медициналық қызмет көрсету деңгейі, дәрі-дәрмекпен қамтамасыз ету, санитарлық-тазалық талаптарының сақталуы тексерілді.

Балабақшада тәрбиеленушілерге жасалған жағдай, тамақтану сапасы, ғимараттың қауіпсіздігі мен тазалығы қаралды. Аудан әкімі бүлдіршіндердің саналы тәрбие алуына қолайлы орта қалыптастырудың маңыздылығын атап өтті.

Сонымен қатар ауылдық мәдениет үйіне барып, ғимараттың жай-күйі, мәдени іс-шараларды өткізу мүмкіндіктері және үйірмелер жұмысын көбейту керектігін назарға салды. Кемшіліктерді шұғыл қалыпқа келтіру бойынша нақты тапсырмалар жүктеді.