Сырдария ауданының әкімі Берік Сәрменбаев аудандық мәслихат төрағасы Ержан Әжікенов, облыстық мәслихат депутаты Жұмабек Ембергенов және “АМАНАТ” партиясы аудандық филиалының атқарушы хатшысы Ақтөре Ибрагимұлы №35 Иса Тоқтыбаев атындағы мектеп-лицейінің жұмысымен танысты.

Аудан басшысы білім беру мекемесінде жастар арасындағы құқық бұзушылықтың алдын алу, оқушыларға құқықтық тәрбие беру, олардың бос уақытын тиімді ұйымдастыру және қауіпсіз білім беру ортасын қалыптастыру бағытында атқарылып жатқан жұмыстарды көрді.

– Қоғамдағы ең өзекті әрі өткір мәселелердің бірі – мектеп оқушылары және жасөспірімдер мен жастар арасындағы құқық бұзушылық, кәмелетке толмағандарға қатысты зорлық-зомбылық, оларға қатысты кибербуллинг әрекеттерінің алдын алу және отбасы құндылықтарын сақтау және бала тәрбиесі болып табылады. Сондықтан да біз отбасындағы тұрмыстық зорлық-зомбылық, жастар мен жасөспірімдер арасындағы құқық бұзушылық мәселесін тек әлеуметтік немесе рухани тұрғыдан ғана емес, құқықтық тұрғыдан да жан-жақты, кешенді түрде қарастыруымыз қажет, – деді Берік Әбдіғаппарұлы.

Кездесу соңында аудан әкімі бұл бағыттағы жұмыстарды жүйелі түрде жалғастыру қажеттігін айтып, нақты тапсырмалар жүктеді.