Сырдария ауданы бойынша аудандық емхана базасында денсаулық сақтау саласының қызметкерлерінің қатысуымен Конституциялық реформаларды талқылауға арналған жиын өтті. Іс-шараға емхана әкімшілігі, дәрігерлер, орта буын медицина қызметкерлері мен сала мамандары қатысты.
Кездесу барысында Конституцияға енгізіліп жатқан өзгерістердің денсаулық сақтау жүйесін жетілдірудегі рөлі, азаматтардың денсаулығын қорғау саласындағы мемлекеттік кепілдіктерді күшейту, медициналық көмектің қолжетімділігі мен сапасын арттыру мәселелері кеңінен сөз болды. Сондай-ақ алғашқы медициналық-санитариялық көмекті дамыту, профилактикалық шараларды күшейту және халыққа көрсетілетін медициналық қызметтердің тиімділігін арттыру бағыттары талқыланды.
Жиынға қатысушылар Конституциялық реформалар аясында медициналық қызмет көрсету саласындағы жауапкершіліктің нақты айқындалуы, пациенттердің құқықтарын қорғау тетіктерінің жетілдірілуі және денсаулық сақтау жүйесіндегі ашықтық пен әділдікті қамтамасыз етуге бағытталған нормаларға ерекше назар аударды.
Талқылау барысында медицина қызметкерлері реформалардың халық денсаулығын нығайтуға, саладағы басқару тетіктерін жетілдіруге және медициналық ұйымдардың жұмыс сапасын арттыруға оң ықпал ететінін атап өтті. Сонымен қатар, медициналық қызметкерлер мен пациенттер арасындағы сенімді қарым-қатынасты нығайту Конституциялық өзгерістердің маңызды бағыттарының бірі екені айтылды.
Кездесу қорытындысында емхана ұжымы ұсынылып отырған Конституциялық реформаларды қолдайтынын білдіріп, денсаулық сақтау саласында сапалы, қауіпсіз және қолжетімді медициналық қызмет көрсету жолында кәсіби жауапкершілікпен еңбек етуді жалғастыра беретіндерін жеткізді.