Сырдария ауданының әкімі Берік Сәрменбаев аудандық мәслихат төрағасы Ержан Әжікенов және “АМАНАТ” партиясы аудандық филиалының атқарушы хатшысы Ақтөре Ибрагимұлымен бірге «Ханшайым» жеке кәсіпкерлік жұмысымен танысты.

Жеке кәсіпкер Айбол Сағындықұлы 2023 жылдан бастап тұрмыстық химия өнімдерін, атап айтқанда кір сабын, иіс сабын және сұйық сабын өндірумен айналысады. Ол 2023 жылы «2021-2025 жылдарға арналған кәсіпкерлікті дамыту жөніндегі ұлттық жоба» мемлекеттік бағдарламасы аясында 1 380 000 теңге көлемінде қайтарымсыз грант алып, жұмысты бастаған. Сонымен қатар, 2024 жылы «Ауыл аманаты» жобасы арқылы 8 млн. теңгеге өндіріс көлемін ұлғайтуға және өнім ассортиментін кеңейтуге қажетті құрал-жабдықтарды алған. Бүгінде «Ханшайым» атымен шығарылып жатқан өнімдері жоғары сапаға ие болып, тұтынушылар арасында сұранысқа ие болуда. Кір сабын, иіс сабын және сұйық сабын түрлері жергілікті нарықта сатылымға шығарылуда.

– Қазіргі таңда Мемлекет басшысының қолдауымен кәсібін ашамын деген жандарға мүмкіндік мол. Көптеген мемлекеттік бағдарламалар жүзеге асырылуда. 2,5 пайызбен берілетін «Ауыл аманаты» жобасы – кәсіпкерлерге үлкен мүмкіндік. Осындай шағын өндіріс арқылы аудан экономикасы дамиды. Жергілікті өнімге қолдау білдірейік, – деді Берік Әбдіғаппарұлы.

Өз кезегінде кәсіпкер мемлекеттік бағдарламалардың тиімділігін айтып, ризашылығын білдірді. Сондай-ақ, кәсібін кеңейтуге қатысты ұсынысын жеткізді. Аудан басшысы аудандық кәсіпкерлік және өнеркәсіп бөлімінің басшысына қолдау көрсетуге нақты тапсырмалар берді.

Сырдария ауданы әкімінің баспасөз қызметі