Мен өзімнің достарымды, сыныптастарымды, ел жастарын рухы биік, өзі еркін, ата-баба аманат еткен ұлы далаға иелік ететін мұзбалақ, сөзі еркін, төрткүл дүниемен саясатта санаса алатын, білімге ұмтылған, білуге құштар ұрпақ болуға шақырамын.
Заман ағымына қарасақ, кейбір жастарымыз бүгінгі күн қасіреті болып отырған, ел ішінде жаман індеттей жайлаған нашақорлық ағымына ілесіп бара жатқандай. Мемлекет басшысы Қ.Тоқаев халыққа арнаған Жолдауында есірткі қылмысын еліміздегі өзекті мәселенің бірі етіп,  әсіресе, жастар арасында белең алуына күрес жүргізуді күшейтуді тапсырды. Осы Жолдауға үн қоса отырып, біз, ел жастары, «Жұмыла көтерген жүк жеңіл» дегендей, нашақорлық індетімен күрестің алғы шебінде жүруге тиіспіз.
Елге тұтқа болар әрбір ұрпақтың көкейінде салауатты, өркениетке ұмтылып тұратын сана қалыптасуы шарт.  Сондықтан жаман әдет, жат қылықтардан аулақ болайық, достар!
Ей, жас өркен, адам болып өтейік,
Кейінгіге үлгі жасап кетейік.
Нашақорлық індетінен аулақ боп,
Сара жолмен болашаққа жетейік!

Арайлым Татаева,
Т.Жүргенов атындағы №80 мектеп-гимназиясының оқушысы.
Қызылорда облысы.