Қызылорда қаласы бойынша 70 518 азамат жер алуға өтініш білдірген. Ал бұған дейін жер алғандардың кейбірі нысаналы мақсатына сай қолданбаған. Керек десеңіз, жерді алуын алып, сол уақыттан бері баспана салуға қам жасамағандар да бар екен. Он сотықты былай қойғанда, гектарлап алған жерін де қараусыз қалдырғандар көп.

– 2005 жылы кезектілікте 11 163 азамат тіркелсе, оның ішінде қалған 2 387 азаматқа жер учаскелерін табыстау жұмыстары жүргізілуде. Бүгінде мамандар Қызылорда қаласында пайдаланылмай жатқан жер учаскелерінің игерілуі бойынша талдаумен айналысып жатыр. Бөлім мамандары мақсатына сай уақытылы игерілмеген жер учаскелерін анықтап, заң талабына және тиісті алгоритмдерге сәйкес мемлекетке қайтаруға бағыттайды. Ал мемлекетке қайтарылған жер учаскелерін келесі кезектегі азаматтарға табыстау мүмкіндігі артады, – дейді Қызылорда қалалық ауыл шаруашылығы және жер қатынастары бөлімінің басшысы Мейрамбек Әжібеков.

Өткен жылы жер учаскесін нысаналы мақсатына сай игермеген кәсіпкерлік мақсатында 894 жер учаскесі анықталды. Ауыл шаруашылығы мақсатындағы көлемі 917 гектарды құрайтын 8 жер учаскесі мемлекеттік жер қорына қайтарылды. Сонымен қатар, жайылымдық мақсатында игерілмеген 894 жер учаскесінің пайдалануына жүргізілген мониторинг нәтижесімен көлемі 75 437,72 гектарды құрайтын 744 жер учаскесіне мал басы тіркелді. Қалған 150 жер учаскесі бойынша меншік иелерін нақтылап, мал басын тіркету жөнінде жұмыстар жүргізілуде.

Айта кетейік, көлемі 4,39 гектарды құрайтын мемлекет меншігіндегі жерді заңсыз иеленген 79 тұлғаға әкімшіліктік жазалау шаралары қолданылып, 12 829 700 теңге әкімшілік айыппұл салынды.