Бір адам тек 5 келі ғана картоп ала алады. Астана дүкендерінде енді осындай шектеулер қойыла бастады. Мәліметке сүйенсек, мұндағылар оның басты себебі, дүкеннен көтерме сатып алып, қайта сатудың алдын алу деп түсіндіреді. Ал басқа өңірлердегі баға қаншалықты? Ал Үкімет бұл қиындықты ескере отырып, экспортты уақытша алты ай мерзімге тоқтатыпты.

Өңірлерге тоқтала кетсек, батыстағы Ақтөбе облысында картоп құны 200 теңгеден 400 теңгеге бір-ақ көтерілген. Жетісу, Павлодар облыстарында да осы баға. Ал Шығыс Қазақстанда тіпті 450 теңгеге жақындаған. Ауа райы салқын Астанадағы баға тұла бойыңды тіпті мұздатып жібереді екен. Бір келі картоптың құны мұнда 455 теңгеге тең.

Қызылордада бұл өнімнің бағасы 400 теңгеге жеткен. Десе де, елдегі тұрақтандыру қорындағы 1 000 тоннаға жуық картопты қала аумағында орналасқан 37 әлеуметтік дүкенге үлестіріп, 143 теңгеден сатып жатыр. Мұнан бөлек, өзара әріптестік аясында 10-нан астам ірі сауда үйі мен басқа да 21 дүкен арқылы 158 теңгеден ұсынылуда. Ал апта сайынғы жәрмеңкеде бұл өнімді халық қажетінше алуда.

– Біз күн сайын картоптың қорына мониторинг жүргіземіз. Тұрақтандыру қорларындағы көлем жеткілікті. Қазір елде шамамен 62 тонна картоп қалды. Орташа есеппен 129-130 теңгеден сатылуда, – деді ҚР Сауда және интеграция министрлігі Сауда комитеті төрағасының орынбасары Ернұр Жәутікбаев.