«Екі қолға бір күрек» іздеп, тұрақты жұмыс іздеген 26 494 адам «Мансап» орталығына тіркелсе, оның 13 368-і уақытша жұмысқа жолдама алды. Ал 4 534 азамат тұрақты жұмысқа орналасты. Бұдан бөлек, Мемлекет басшысының 10 мың адамға 100 жаңа жұмыс орнын ашу жөніндегі тапсырмасы аясында қалада 5 838 жаңа жұмыс орны ашылды. Ал, бас бостандығынан айыру орындарынан босатылған және пробация қызметінің есебінде тұрған 131 адам жұмысқа орналасты. Бұл туралы Қызылорда қалалық жұмыспен қамту және әлеуметтік бағдарламалар бөлімі басшысының орынбасары Алмас Орынбеков айтты.

Бір жыл ішінде 4591 адамға атаулы әлеуметтік көмек төленіп, 7415 балаға қосымша төлем, 7 200 балаға жолда жүру ақысы аударылды. 1966 адамға тұрғын үй көмегі көрсетілген. Жекелеген санаттағы әлеуметтік қолдауды қажет ететін 3346 адамға әлеуметтік төлем жүргізілсе, 14 097 мүгедектігі бар адамдар мен балаларға біржолғы әлеуметтік көмек төленді. Сонымен қатар, демеушілер тарапынан 4465 отбасыға көмек көрсетілген.

– Биылдан бастап атаулы әлеуметтік көмекке үміткер отбасылардың материалдық жағдайына тексеру жүргізу үшін «FSM Social» мобильді қосымшасы енгізіліп, учаскелік комиссиялардың қызметі цифрландырылды. Бұл нақты мұқтаж азаматтардың жиынтық кірістері мен шығыстарын айқындауды ескере отырып, шешім шығару кезінде сыбайлас жемқорлық тәуекелдерін азайтуға, сондай-ақ өтініш берушінің геолокациясын айқындауға мүмкіндік береді, – деді Алмас Нұрболатұлы.