Смартфон ішінен баланы алып шығып, шынайы өмірге баулу – бүгінгі күннің өзекті мәселесі. Қызылорда іргесіндегі Қоғалыкөл ауылдық клубының басшысы, Сырдария аудандық мәслихат депутаты Динара Ибадуллаева үйірмеге қатысушы балалардың уақытын қызықты өткізуді дағды еткен. Оның бастамасымен жақында мектеп оқушылары ауыл ұстасы, темірден түйін түйген өнер адамы Талғат Ыдырысовпен кездесті.

Кездесуде балалар ұстаның темірді қыздырып, оны қалай қалыпқа келтіргенін көзбен көрді. Тіпті, қызығушылықтары оянып, түрлі сауалдар жолдады. Клуб үйінің қызметкерлері Күлшара Сарбасова мен Райхан Шүкірәлиева балалардың әрбір күнін осылай естен кетпестей етіп өткізуде.

– Қазір мұндай іс-шараларды өткізуді дағды еткенбіз. Біздің ең бірінші мақсатымыз – балаларды смартфон ішінен алып шыққымыз келгені. Бойларында өнері бар ауыл азаматтарымен кездестіріп, әрбір өнердің қыр-сырына қанықтырып жүрміз. «Ел іші – өнер кеніші» деген дана халқымыздың әрбір сәтте осынау ұлттың ұлылығын паш ететін өнерін бойына сыйдырған азаматтары арқылы ұрпақтар сабақтастығын қалыптастыруымыз керек, – дейді Динара Дүйсенбайқызы.