Сырдария ауданы әкімі Берік Сәрменбаев “Тереңөзек электр торабы” мекемесіне барып, апаттық жағдайда күндіз-түні тынымсыз еңбек етіп, ауданды жарықпен қамтамасыз еткен сала қызметкерлеріне аймақ басшысының алғысын жеткізді.

— Баршаңызға белгілі, қыстың соңғы күндері өңірімізде табиғат тосын мінез көрсетіп, қолайсыз жағдайлардың орын алуы салдарынан бірқатар елді мекендердегі электр желілері мен қондырғыларға, ағаштарға толықтай мұз қатып, қалың қар жауып, темір-бетон бағаналар мен талдар құлады. Орын алған апаттық жағдайларды қалпына келтіру мақсатында аймақ басшысының тапсырмасымен жедел штаб құрылып, арнайы комиссия жұмыс жасады. Тұрғындарды мүмкіндігінше қысқа мерзімде электр энергиясымен қайта қамтамасыз ету жұмыстары 24 сағат үзіліссіз, күшейтілген режимде жүргізіліп, барлығы қалпына келтірілді. Бұл жағдай өңіріміз үшін табиғаттың үлкен сынағы болды. Осындай сын сағатта ерлікке тең еңбек етіп, бірліктің берік үлгісін танытқан сала қызметкерлеріне облыс әкімі шексіз ризашылығын білдіріп, арнайы «Алғыс хатын» жолдады. Табиғаттың тосын мінезінен туындаған қиыншылықты ел болып бірге еңсердік. Ауызбірлік танытқан аудан халқына алғысымыз шексіз, – деді Берік Әбдіғаппарұлы.

Кездесуде аудандық мәслихат төрағасы Ержан Әжікенов, облыстық мәслихат депутаты Жұмабек Ембергенов, меценат Мақсұт Әбілдаев сала қызметкерлерінің ерен еңбектеріне алғыстарын жеткізді.