«Әділетті және Прогрессивті Қазақстанның Халықтық Конституциясы үшін!» аумақтық коалициясының мүшелері Сырдария ауданы, Қоғалыкөл ауылының тұрғындарымен кездесті. Кездесу барысында елдегі қоғамдық-саяси жаңалықтар, жүзеге асырылып жатқан реформалар және алдағы жоспарлар туралы кеңінен ақпарат берілді.

Кездесуге аумақтық коалиция мүшелері Ақтөре Ибрагимұлы, Сламбек Қаюпов, Ғалымбек Жаппаров, Елдос Жаппасбаев қатысты.

Кездесу барысында аумақтық коалиция мүшелері ел болашағына тікелей әсер ететін маңызды құжат – жаңа Конституция жобасы туралы ашық әңгіме жүргізіп, азаматтардың құқығын нығайту, ауыл тұрғындарының әлеуметтік ахуалын жақсарту, еңбек адамдарын қолдау сынды маңызды бағыттарға кеңінен тоқталды. Тұрғындар тарапынан түрлі бағытқа қатысты көкейтесті сауалдар қойылып, коалиция мүшелері толыққанды жауап берді.

Аумақтық коалция мүшесі Ақтөре Ибрагимұлы жаңа Конституцияның ел дамуына берер пайдасына тоқталып, әр азаматтың құқықтары мен бостандықтарын қорғау, әділетті басқару жүйесін қалыптастыру және халықтың әл-ауқатын арттыру басты мақсат екенін нақты мысалдармен түсіндірді. Сондай-ақ, 15-наурызда өтетін жалпыхалықтық референдумның әр азамат үшін тарихи және жауапкершілікті айқындайтын сәт екенін ерекше атап өтті.

Өз кезегінде, Коалиция мүшесі Ғалымбек Жаппаров жаңа Конституция ел болашағы үшін ерекше маңызға ие екенін атап өтті.

«Ата Заң – мемлекет пен қоғамның даму бағдарын айқындайтын басты құжат. Сондықтан жаңа Конституцияны қабылдау арқылы еліміздің саяси жүйесі жаңарып, азаматтардың құқығы мен мүмкіндігі кеңейе түседі. Осы орайда, ел тағдырына қатысты маңызды шешімдер қабылданатын кезде азаматтардың белсенділігі аса маңызды», – деді ол.