Үкіметтің кеңейтілген отырысында Премьер-министр Олжас Бектенов аймақтардың экономикалық өсіміне тоқталды. Қызылорда облысы бұл бағыт бойынша алдыңғы қатарға шыққан.

 – Өңірлер бөлінісінде өткен жылдың қорытындысы бойынша ең жоғары экономикалық өсім Солтүстік Қазақстан, Қарағанды, Түркістан, Қызылорда облыстары мен Астана және Шымкент қалаларында тіркелді. Негізгі көрсеткіштердің төмен динамикасы Ұлытау, Атырау, Батыс Қазақстан, Жамбыл облыстарында қалыптасты, — деді Олжас Бектенов.

Дереккөзге сүйенсек, 2024 жылы экономикалық көрсеткіш 4,8 пайызға жоғарылаған. Ең жоғарғы өсім ауыл шаруашылығы саласында байқалды. Бұл – 13,7 пайыз. Ал құрылыста – 13,1, саудада – 9,1, көлік саласында 8,5 пайыз деңгейінде өсімге қол жеткізілді. Өңдеу өнеркәсібінің көлемі 5,9 пайызға көтерілген.