Елдегі мәселелердің әрбірі мемлекет назарынан тыс қалмайды. Халықтың сапалы өмір сүруіне барынша жағдай жасалу керек. Қоғам, жастар, дін және отбасылық мәселелер – мұның барлығына қатысты қарқынды жұмыс істелуде. Бұл туралы Қызылорда қалалық қоғамдық даму бөлімінің басшысы Айдын Қайруллаев БАҚ өкілдерімен кездесуінде айтты.

– Тұрғындардың өзекті мәселелері бойынша тоқсан сайын арнайы карта әзірленіп, соның нәтижесінде жауапты мемлекеттік органдармен бірлесіп, тиісті шаралар қабылдануда. Қаладағы діни ахуал да тұрақты. Жергілікті теологтардан өзге республикалық ақпараттық түсіндірме топ мүшелерімен де, атап айтқанда, «Нұр-Мүбәрак» университетінің Діни экстремизмге қарсы іс-қимыл орталығының директоры, теология ғылымдарының Phd докторы Сәкен Сайранұлы, республикалық ақпараттық түсіндіру тобының мүшелері Болат Шоманов, Асхат Ерубай қалаға шақырылып, тұрғындармен кездесулер ұйымдастырылды. Халық көп шоғырланатын орындарда облыстық дін мәселелерін зерттеу орталығымен бірлесіп акциялар өткізіліп, тұрғындарға ақпараттық үнпарақтар таратылды. Қала аумағында 3 жерде діни әдебиеттер мен діни мазмұндағы заттарды сату орны белгіленген, – деді Айдын Бөкенбайұлы.

Қала халқының мұң-мұқтажы қашан да тыңдалады. Олардың әрбірінің сапалы өмір сүруіне жағдай жасалып келеді. Тұрғындардың әлеуметтік желілерде жариялаған түрлі арыз-шағым, өтініш-тілектеріне талдау жұмыстары күнделікті жүргізіп келеді. Бұл бағытта «Open Qyzylorda» жобасы арқылы жұмыстар жүргізілуде. Келіп түскен әр сауал жауапсыз қалмады. Айтпақшы, бөлім тарапынан 2025 жылы аталып өтетін тарихи атаулы даталардың қатарында Қызылорда қаласының астана болғанына және «Қазақ» атауының қайтарылуына – 100 жыл, Ұлы Жеңістің 80 жылдығы, Қазақстан Республикасының Конституциясына 30 жыл және Қазақстан халқы Ассамблеясының құрылғанына 30 жыл толуы бар. Ал биылғы «Жұмысшы мамандықтар» жылы бойынша да ауқымды шаруалар атқарылмақ.