Жалға алған тұрғын үйіңізді жекешелендіре аласыз. ҚР «Тұрғын үй қатынастары туралы» Заңына енгізілген өзгерістердің бірі – осы. Бұл туралы қалалық тұрғын үй инспекциясы бөлімінің басшысы Абзал Рысбек брифингте айтты.

Бүгінде Қызылорда қаласында тұрғын үйге мұқтаждар тізімінде 25 971 адам бар. Олар 6 тізім бойынша жасақталған.  Өткен жылы кезекте тұрған отбасыларға 993 арендалық пәтер табысталса, биыл 1240 пәтер халықтың әлеуметтік жағынан әлсіз топтарына, жетім балалар мен ата-анасының қамқорлығынсыз қалған балалар тобына және 135 пәтер жалғыз баспанасы апатты деп танылып, кезекте тұрған отбасыларға беріледі деп жоспарлануда.

– 2024 жылдың 22 қарашасында ҚР «Тұрғын үй қатынастары туралы» Заңына өзгерістер енгізілді. Осы Заңның 13-бабына сәйкес, 2017 жылдан бастап бүгінгі күнге дейін пайдалануға сатып алу құқығынсыз жалға берілген тұрғынжайлар мен жалғыз тұрғын үйі авариялық жағдайда деп танылған азаматтар енді өз баспаналарын жекешелендіре алады. Аталған мемлекеттік қызмет түрі E-Qazyna порталы арқылы жүргізіледі және комиссия шешімімен қаралады, – деді бөлім басшысы Абзал Рысбек.

Махаббат САБЫРЖАН