Қызылорда облысы Шиелі ауданында пробация есебіндегі азаматтарға арналған бос жұмыс орындары жәрмеңкесі өтіп, бірнеше адам тұрақты жұмыспен қамтылды. Аудан прокуратурасының үйлестіруімен пробация қызметі, жұмыспен қамту бөлімі және «Мансап» орталығы бірлесіп, бос жұмыс орындары жәрмеңкесін ұйымдастырды.

Іс-шараға пробация есебінде тұрған азаматтармен қатар жергілікті тұрғындар да қатысты. Жәрмеңке барысында аудан бойынша 26 мекемеден 145 бос жұмыс орны ұсынылды. Жұмыс берушілер әртүрлі саладағы вакансияларды таныстырып, қатысушыларға толық ақпарат берді. Шараның негізгі мақсаты – жұмыссыз азаматтарды еңбекке тарту, оларды қоғамға бейімдеуге жағдай жасау. Нәтижесінде пробация есебіндегі 3 азамат тұрақты жұмысқа, ал 1 адам ақылы қоғамдық жұмысқа орналастырылды. – Жәрмеңкеге келіп, жұмыс таптым. Қазір жұмыс табу оңай емес, сотталғандарды жұмысқа ала бермейді. Бүгінгі жәрмеңкенің арқасында адал еңбегіммен отбасымды асырауға мүмкіндік туғанына қуаныштымын, – деді қатысушылардың бірі. Қазіргі таңда Шиелі аудандық пробация қызметінің есебінде 70-тен астам адам бар. Оларды қоғамға бейімдеу, жұмыспен қамту және қайта қылмыс жасаудың алдын алу мақсатында мұндай шаралар тұрақты түрде ұйымдастырылып келеді.