Жуырда пробация есебіне алынған Нұржан есімді сотталғанға электронды білезік тағылды. Ол адамның денсаулығына қасақана зиян келтіргені үшін сот үкімімен 3 жылға бас бостандығынан айырылып, жазасын орташа қауіпсіз мекемеде өтеп, сот қаулысымен ҚР ҚК- нің 73 — бабымен жазасының өтелмеген бөлігі бас бостандығын шектеу жазасына ауыстырылып, пробация есебіне алынған.

– Пробация қызметінің мамандары аяғыма электронды білезік тақты. Мен қарсы болған жоқпын. Қайта осы браслет таққан соң тәртіп сақтап, кешкілік үйде боламын. Жасым 20-да, темір тордың ар жағында отырғаннан гөрі бостандықта білезік тағып жазамды өтегенім жақсы, – дейді Нұржан.
Қызылорда қалалық Пробация қызметінің инспекторы әділет майоры Жадыра Исмайлованың айтуынша электронды құрылғы сотталғандардың жүріс-тұрысын тәулік бойы бақылауға, олардың белгіленген шектеулерді сақтауын қамтамасыз етуге көмектеседі.
– Білезікті таққаннан кейін ол жайында ақпарат планшетте пайда болады. Қайда барғанын, жүргенін бәрін «GPRS» арқылы көріп отырамыз. Егер ол белгілі бір рұқсат етілген аумақтан шығатын болса, оны бірден көреміз, – дейді пробация инспекторы.