Сыр өңірінде «Ішімдіксіз ауыл» бастамасы кең қанат жайып келеді, — деп хабарлайды Polisia.kz.

Қызылорда облысында «Ішімдіксіз ауыл» бастамасы кезең-кезеңімен жүзеге асырылып, бүгінде кең ауқымға ие болуда. Қазіргі таңда өңірде алкоголь өнімдерін тұтынудан және сатудан толықтай бас тартқан 37 елдімекен тіркелді.

Аталған игі бастама тұрғындардың қауіпсіздігін қамтамасыз етуге, қоғамдық тәртіпті нығайтуға және халықтың әл-ауқатын арттыруға оң ықпал етіп отыр. Жалағаш ауданында бұл бастамаға 13 ауыл қосылды. Атап айтқанда, Таң, Еңбек, Есет батыр, Т.Жүргенов, Жаңаталап, Мырзабай ахун, Шәменов, Аққұм, Ақсу, Аққыр, Бұқарбай батыр, Жаңадария және Қаракеткен елді мекендерінің тұрғындары алкоголь өнімдерінен толықтай бас тарту жөнінде ортақ шешім қабылдады.

Бұл шешім жергілікті қауымдастық, ақсақалдар кеңесі және құқық қорғау органдарының қатысуымен өткен кездесулер барысында қабылданды. Жиындарда қоғамдық тәртіпті сақтау, құқық бұзушылықтардың алдын алу, отбасы құндылықтарын нығайту және салауатты өмір салтын қалыптастыру мәселелері жан-жақты талқыланды. Бастама «Заң мен тәртіп» қағидаты аясында жүзеге асырылуда. Ауыл кәсіпкерлерінің айтуынша, тұрғындардың ортақ ұстанымын қолдау мақсатында сауда орындарында алкоголь өнімдерін сату толықтай тоқтатылған. Бұл қадам ауылдағы тыныштықты сақтауға және халықтың денсаулығын қорғауға бағытталған. Өз кезегінде учаскелік полиция инспекторлары мұндай бастамалардың қоғамдық қауіпсіздікті нығайтудағы маңызын атап өтті. Тәжірибе көрсеткендей, алкогольден бас тартқан ауылдарда құқық бұзушылықтар мен тұрмыстық жанжалдар айтарлықтай азаяды. Қазіргі уақытта Жалағаш ауданындағы бірқатар ауылдық округтерде қылмыс тіркелмеген. Бұл – тұрғындардың ауызбіршілігі мен саналы таңдауының нақты нәтижесі. Жалпы, «Ішімдіксіз ауыл» бастамасы – қоғам жауапкершілігі мен бірлігінің айқын көрінісі. Мұндай игі қадамдар өңірдегі қоғамдық тұрақтылықты нығайтып, халықтың өмір сүру сапасын арттыруға берік негіз қалайды.