«Kazakh Tourism» «Үздік туристік ауыл – 2025» ұлттық байқауының қорытындысын шығарды. Жеңімпаз ауылдар БҰҰ-ның Дүниежүзілік туристік ұйымының жыл сайынғы халықаралық байқауында еліміздің намысын қорғайтын болады. Бұл туралы «ORDA» ақпараттық-сараптамалық порталында жарияланды.
Туристер үшін ең үздік ауылдардың қатарында Қызылорда облысындағы Нағи Ілиясов ауылы да бар.
2013 жылдан бастап ауылда ауқымды абаттандыру және инфрақұрылымды жаңарту жұмыстары жүргізілді. Нәтижесінде, ауыл заманауи келбетке ие болып, облыстағы үлгілі елді мекендердің біріне айналды.
Ауылдың қазіргі дамуында «Абзал и К» және «Мағжан и К» серіктестіктерінің үлесі зор. Олар ауыл шаруашылығы саласында белсенді қызмет атқарып, ауылдың әлеуметтік-экономикалық дамуына елеулі ықпал етуде. 2023 жылы Қазақстан Республикасының Президенті Қасым-Жомарт Тоқаев ауылға сапармен келіп, оның тыныс-тіршілігімен танысты.
Айта кетейік, үздік бес ауылдың қатарында Нағи Ілиясов ауылынан бөлек, Жетісу облысының Алакөл ауданына қарасты Лепсі ауылы, Батыс Қазақстандағы Бөкей ордасы ауданының Хан ордасы ауылы, Шығыс Қазақстандағы Риддерге қарасты Поперечное және Қарағанды облысы Ақтоғай ауданына қарасты Шабанбай би ауылы бар.