Оқу жылы кезеңінде балалардың жол қауіпсіздігі мәселесі ерекше маңызға ие.
Күн сайын мыңдаған оқушы мектепке қатынайтын уақытта түрлі жолдардан, жолаушылар өткелдерінен өтеді. Дәл осы сәтте олардың қауіпсіздігіне ерекше назар аудару қажеттігі туындайды.
Осы бағытта Қызылорда қаласының полицейлері білім беру ұйымдарының маңында күшейтілген режимде қызмет атқарады. Әсіресе таңғы және сабақ аяқталғаннан кейінгі қарбалас уақытта патрульдік және ювеналды полиция қызметкерлері жаяу жүргіншілер өткелдерінде кезекшілікте. Олар көлік қозғалысын реттеп қана қоймай, балаларға жолды қауіпсіз өтуге көмектеседі және жүргізушілерге жылдамдық режимін сақтау қажеттігін де ескертеді.
Сонымен қатар профилактикалық жұмыстар жүйелі түрде жүргізілуде. Тәртіп сақшылары мектеп оқушылары үшін түсіндіру жұмыстарын жүргізіп, жолда өзін қауіпсіз ұстау мәдениетін қалыптастыруға ерекше мән береді. Жүргізушілерге де білім беру ұйымдары маңында жол қозғалысы ережелерін бұзудың жауапкершілігі түсіндірілуде. Мұндай кешенді жұмыстар балалардың қатысуымен болатын жол-көлік оқиғаларының алдын алуға мүмкіндік береді.
– Полиция қызметкерлерінің қоғамдық орындарда болуы жол қозғалысына қатысушылардың тәртібіне оң әсер етеді. Жүргізушілер барынша мұқият бола түседі, ал балалар өздерін қауіпсіз сезінеді. Біздің басты мақсатымыз – әрбір баланың өмірі мен денсаулығын қорғау, сондай-ақ қауіпсіз мінез-құлық мәдениетін қалыптастыру. Бұл бағыттағы жұмыс ата-аналардың жауапкершілігін арттыруға да ықпал етеді – дейді Қызылорда облысы Полиция департаментінің бастығы Серік Ергешов.
Балалардың қауіпсіздігі – баршамызға ортақ жауапкершілік. Жаяу жүргіншілер өткелдерінде ұйымдастырылған патрульдік қызмет – осы қауіпсіздікті қамтамасыз етудің маңызды тетіктерінің бірі. Тәртіп сақшыларының күнделікті еңбегінің арқасында балалар үшін мектепке апарар жол барынша қауіпсіз әрі сенімді бола түсуде.