Елімізде Мемлекет басшысының бастамасымен өтіп жатқан «Таза Қазақстан» бағдарламасының іске асырылуына ерекше назар аударылуда.

Қоғамның дамуы мен өркениетті ел қатарына қосылуы тек экономикалық жетістіктермен ғана емес, қоршаған ортаның тазалығы мен қоғамдық тәртіптің сақталуымен де өлшенеді. Бұл тұрғыда полицияның қызметі айрықша маңызға ие.

Полиция қызметкерлері «Таза Қазақстан» бағдарламасы аясында тазалық талаптарының сақталуын қадағалауда маңызды рөл атқарады. Бұл шаралар қоғамда тәртіп пен жауапкершілікті қалыптастыруға ықпал етеді.

Қызылорда ПД Қоғамдық қауіпсіздік басқармасының табиғатты қорғау полициясы бөліністері ұйымдастырушылық-талдамалы бөліністермен бірлесіп, арнайы жұмыс тобын құрды.

Оның ішінде учаскелік полиция инспекторларымен өздерінің қызмет ететін аумақтарында стихиялық қоқыс орындарын және оның пайда болу көздерін анықтау бойынша жұмыстар атқарылуда. Бағдарлама басталғалы полиция қызметкерлерімен 22 мыңнан астам құқық бұзушылықтың жолы кесілді. Оның ішінде қалалар мен елді-мекендердің аумақтарын абаттандыру қағидаларын бұзу, сондай-ақ қалалар мен елді-мекендер инфрақұрылымы объектілерін бұзу, жасыл екпелерін жою және бүлдіру, ортақ пайдаланатын орындарды ластау деректері де бар.

«Таза Қазақстан» – тек мемлекеттік бағдарлама емес, ол – әр азаматтың борышы. Ал полиция осы борыштың орындалуын қамтамасыз ететін маңызды құрылымдардың бірі. Қоғамда тазалық пен тәртіп қатар орныққанда ғана еліміз шынайы өркениетке қадам баспақ.