Қазақстан Республикасының мемлекеттік тілі – қазақ тілі. Ол тек қарым-қатынас құралы ғана емес, елдің бірлігі мен тұтастығын айқындайтын басты құндылықтардың бірі. Мемлекеттік тілдің мәртебесін арттыру, оны барлық салада кеңінен қолдану – әрбір мемлекеттік қызметшінің, оның ішінде сот жүйесі қызметкерлерінің негізгі міндеттерінің бірі.

Сот жүйесі – заң үстемдігін қамтамасыз ететін, азаматтардың құқықтары мен бостандықтарын қорғайтын маңызды институт. Осы орайда сот ісін жүргізуде мемлекеттік тілдің қолданылуы ерекше маңызға ие. Себебі сотта қаралатын әрбір іс азаматтардың тағдырына тікелей әсер етеді, ал сот актілерінің түсінікті әрі нақты мемлекеттік тілде жазылуы – әділ сот төрелігінің ажырамас бөлігі.

Сот мамандары үшін мемлекеттік тілді жетік меңгеру – кәсіби талаптардың бірі. Іс жүргізу құжаттарын әзірлеу, сот отырыстарын жүргізу, тараптармен қарым-қатынас жасау барысында мемлекеттік тілдің сауатты әрі орынды қолданылуы қызмет сапасын арттырады. Сонымен қатар, бұл халықтың сотқа деген сенімін нығайтады.

Бүгінде сот жүйесінде мемлекеттік тілдің қолданылу аясын кеңейту бағытында жүйелі жұмыстар жүргізілуде. Құжат айналымы, сот актілері, ресми хабарламалар мен ақпараттық материалдар қазақ тілінде дайындалып, азаматтарға қолжетімді түрде ұсынылуда. Бұл өз кезегінде мемлекеттік тілдің қызмет тілі ретіндегі рөлін күшейтеді.

Мемлекеттік тіл – тәуелсіздігіміздің тірегі. Оны құрметтеу, дамыту және күнделікті қызметте кеңінен қолдану – баршамыздың ортақ парызымыз. Әсіресе, сот саласында еңбек ететін мамандар үшін бұл талап қана емес, кәсіби абыройдың көрсеткіші.

Қорытындылай келе, мемлекеттік тілдің қызмет тілі ретінде орнығуы – уақыт талабы. Әрбір сот қызметкері осы бағытта белсенділік танытып, мемлекеттік тілдің мәртебесін көтеруге өз үлесін қосуы тиіс.

А.Махсутова,
Қызылорда қалалық сотының
жетекші маманы