Қызылордада төрт жыл ішінде 24 заманауи спорт кешені пайдалануға берілді. Шалғай елді мекендер мен ауыл балалары да үйірмеге үйір болып, спорт бәсекелерінде бақ сынап жүргені көңілге қуаныш ұялатады. Байрақты бәсекелерде топ жарып жүрген таланттар шоғыры қалыптасуда. Мұның өзі елдегі спорт саласының серпін алғанын көрсетіп тұр. Бүгін өңірлік коммуникациялар қызметінде өткен брифингте саланың өзекті мәселелері көтеріліп, «Қайсар» футбол клубының жай-күйі айтылды.

 «Қызылорда Арена» күзде пайдалануға берілмек

Облыс орталығынан бой көтеріп жатқан «Қызылорда Арена» спорт кешені жыл соңына дейін пайдалануға берілмек. Облыс әкімінің орынбасары Мейрамбек Шермағанбет нысанның күзде ашылатынын айтты. Мұнан бөлек, өңірде көпшілік ашылуын күтіп жүрген басқа да нысандар бар.

– Қаламыздың сол жағалауында «Самұрық Қазына» ұлттық әл-ауқат қорымен бірлескен түрде салынған құны 3,4 млрд теңгеге «Теннис орталығы»,  халықаралық талаптарға сай келетін құны 26,5 млрд теңгені құрайтын 11 мың орындық «Қайсар Арена» стадионы, Қазақстан Халқына қоғамдық қорының демеушілігімен құны 2,9 млрд теңгені құрайтын ерекше қажеттілігі бар жандарға арналған «Инклюзивті спорт орталығы» секілді бірегей нысандар спортшыларымыздың игілігіне берілді. Сондай-ақ, облыс орталығында құны 20 млрд 500 млн теңгені құрайтын аумағы 26 мың шаршы метрлік көпбейінді «Қызылорда Арена» спорт кешені салынуда. Кешенде олимпиадалық стандартқа сай 50/25 метрлік жүзу бассейні және олимпиадалық спорт түрлеріне арналған жаттығу залдарымен қамтылады. Биыл күзде нысан пайдалануға беріледі.

Сондай-ақ, Әлем және Азия ойындары секілді халықаралық жарыстарды өткізуге арналған 2500 орындық зал,  ауқымды жиындар, форумдар және кездесулер өткізуге арналған соңғы үлгідегі 150 адамдық жиын өткізу залы қарастырылады. Одан бөлек, халықтың салауатты өмір сүру салтын қалыптастыруға арналған кәсіби фитнес залдары салынады, – деді Мейрамбек Зинабдинұлы.

 «Алдағы бес жылда «Қайсарды» бюджеттен қаржыландыру тоқтайды»

«Қайсар» футбол клубы өткен жылдан бастап жеке басқаруға өткен болатын. Облыс әкімінің орынбасары алдағы бес жылда клубты бюджеттен қаржыландыру түбегейлі тоқтайтынын айтты.

– Алдағы 5 жылда «Қайсар» футбол клубына облыстық бюджеттен белгілі бір көлемде қаржы қарастырылады. Осы уақыт аралығында қаржы көлемі кезең-кезеңімен азайып, бес жылдан кейін облыстық бюджеттен қаржыландыру толық тоқтатылады. Биыл жергілікті клубқа бөлінген қаржы 200 млн теңгеге дейін қысқартылды, – деді М.Шермағанбет.

Айта кетейік, 2019 жылы облыстық бюджеттен жергілікті клубқа  4 млрд теңге көлемінде қомақты қаржы бөлінген. Сәйкесінше, 2020 жылы – 2,6 млрд, 2021 жылы – 1,6 млрд, 2022 жылы – 605 млн 702 мың, 2023 жылы – 1,2 млрд, 2024 жылы – 1,6 млрд, 2025 жылы 1,2 млрд теңге қаралса, 2026 жылы 995 млн теңге бөлінді. Биылғы қаржының жайы бөлек. Өйткені, өткен жылы жеке басқаруға өткен «Қайсарға» облыстық бюджеттен мемлекеттік сатып алу заңына сәйкес конкурс өткізіліп, 995 млн теңгені «TAU Group LTD» компаниясы жеңімпаз болып алды.

Қарызды қалай жабамыз?

«Қайсар» футбол клубының 2020 жылдан бастап қалыптасқан 753 млн теңге көлемінде берешегі болды. Қазіргі кезге дейін клуб берешегінің жартысы жабылды.

– Қазіргі таңда инвестор 18 млрд теңгеге «Қайсар» академиясын салуда. Биылғы жылы негізгі база мен жаттығатын 3 алаңды салып, күз айларында пайдалануға беру жоспарланып отыр. Қазір құрылыс жұмыстары қарқынды жүруде. Ал толық кешенді 2027 жылдың соңына дейін пайдалануға беру жоспарлануда.

Бұл жоба клубтың ұзақ мерзімді дамуына бағытталған негізгі инвестициясы. Жалпы клубтың стратегиясы 5-10 жылдық жүйелі өсімге бағытталған. Жоба аясында 7 толық өлшемді және 2 балалар алаңының құрылысы, сонымен қатар жабық манеж бен ойыншыларды қалпына келтіруге арналған медициналық орталық қарастырылған. Бұл академия қабырғасынан тәрбиеленіп шыққан спортшылар болашақта жергілікті «Қайсар» футбол клубын биік шыңдардан көрсетеді деп нық сеніммен айта аламыз. Біз бұл бағытта жасөспірімдер футболын әрдайым қолдап келеміз, алдағы уақытта да қолдайтын боламыз.

Тағы бір айта кетерлігі, жаңадан салынған стадионды күтіп ұстау шығындарының жылдық көлемі 500 млн теңгені құрайды. Бұл қаржы толықтай жеке инвестордың өзінің қаражаты, бюджеттен оған ешқандай қаржы бөлінбеген, – дейді облыс әкімінің орынбасары.

Академиядан күтер үміт мол

Клубтың иесі  –  «TAU Group LTD» компаниясының басшысы, жерлесіміз Исламғали Қозбақов «Қайсар» академиясынан зор үміт күтетінін айтты.

– Бұл – халықтың клубы. Елге жұмыс істейміз. Біздегі мақсат – әрі ойынды дұрыстау, әрі академияны салып, жүйеге қою. Жанкүйерлерді түсінемін, жақсы нәтиже күтеді. Біз де сенімді ақтауға жұмыс істейміз. Ал академия болашақта мұнан да жақсы жетістіктерге жету үшін керек, – деді ол.