Қызылордада «Таза Қазақстан» экологиялық бағдарламасы аясында жалпыхалықтық «Тағзым орны таза болсын, рух пен тазалық – егіз ұғым» атты акция өтті. 

Өңірдегі тарихи-мәдени ескерткіштер, киелі орындар мен көпшілік зират ететін барлық аумақтарға көркейту-көгалдандыру жұмыстары ұйымдастырылды. Сонымен қатар, ағаш отырғызу, қоршауларды ретке келтіру, жолдарды тазалау және жөндеу секілді жұмыстар да жүргізілді.

Қала іргесіндегі Қарауылтөбе ауылының тұрғындары да бұл іске бей-жай қарамады. Тұрғындар бір ауыздан жұмылып, мешіт пен қасиетті орындардан бөлек, ауыл ішін қоқыстан арылтты. Ауыл әкімі Еркін Ахетов мұндай игі істер тұрақты жүргізілетінін айтады.

«Біз әр квартал сайын ауыл жаппай тазалық жұмыстарына атсалысамыз. Сенбіліктен бөлек ие, жұмыла жүк көтеріп жүрміз. «Тазалық- иманның жартысы» деген бар. Айналаң таза болса, ісің де берекелі болады», — дейді ол.

Ақжарма ауылдық округінің халқы да қасиетті орындарға ат басын бұрып, аға ұрпақ алдында парыз орындады. Ауыл әкімі Саттар Бейбітұлы іс-шарада ауқымды шаруа атқарылғанын айтады.

«Ауыл сыртындағы Көтібар мұнарасынан бастап, қорымдарды тазарттық. «Өлі разы болмай, тірі байымайды» деген бар. Мұнан бөлек, көркейту-көгалдандыру бағытында да жұмыс ауқымды», — деді С.Әбдіреев.

Айта кету керек, облыста 72 нысан киелі орындар тізбесіне енгізілген. Қасиетті кесенелерге жергілікті бюджеттен және демеушілердің қолдауымен реставрациялық, жөндеу жұмыстарын жүргізіп, келушілерге ыңғайлы әрі қолжетімді ету мақсатында инфрақұрылымдары жақсартылды.

Акция аясында аймақтағы 200-ге жуық қасиетті орындар мен зираттардың аумағын тазалау жұмыстарына 20 мыңнан аса тұрғындар белсенді қатысты. Бұл бағыттағы игі істер алдағы уақытта да жалғасын табатын болады.