Халықтың қолын аузына жеткізуді мақсат еткен «Ауыл аманаты» жобасы өңірде белсенді жүргізілуде. Бүгінде келіп түскен 850 өтінімнің 413-і мақұлданып, 291 жоба қаржыландырылып үлгерген. Өткен жылғы жемісті бастамалар да жетерлік. Ауыл-аймақтағы ағайын ойдағы жоспарын нәтижелі іске айналдырып жатыр. Бұл бағытта аталған жобаның маңызы жоғары.

 Жоба аясында 2023-2024 жылдары 5,5 млрд тенгеге 782 жоба жүзеге асырылды. Ал 2023 жылы өңірде 3 млрд теңгеге – 406 жоба, 2024 жылы – 2,5 млрд теңгеге 376 жоба іске қосылды. Нәтижесі де жаман емес. Осы жобаның аясында екі жылда 1 110 жаңа жұмыс орны ашылды. Облыстық ауыл шаруашылығы және жер қатынастары басқармасының инвестиция және кооперация бөлімінің басшысы Гүлмира Исабергенованың айтуынша, нақты жоба аясында аймақтағы кәсіпкерлік саны да артқан.

– Шағын кәсіпкерлік саны 275 бірлікке артты. Мұнан бөлек, 50 өндірістік кооперативі құрылды. Өңдеу саласы бойынша 158 кәсіпорын және жалпы алаңы 2 гектарға жететін 56 жылыжай өндірісі ашылды. Сондай-ақ, 2 676 бас асыл тұқымды мал сатып алынды. Мұның барлығы аталған жоба аясында қол жеткізген нәтиже, – дейді Гүлмира Рахымжанқызы.

Айта кетейік, өткен жылы өңірге бағдарлама аясында 5,5 млрд теңге бөлініп, 443 жобаны іске қосу жоспарланды (бірінші транш — 1,1 млрд. тг.,27.07.2025ж., екінші транш – 1,1 млрд. тг., 30.10.2025 ж., үшінші транш – 3,3 млрд. тг., 28.11.25 ж.).

– Қазіргі таңда «Amanatnesie.kz» электронды порталы арқылы 7,8 млрд теңгеге 850 өтінім түсіп, несие комитетімен 3,4 млрд теңгеге 413 жоба мақұлданып, бүгінгі күнге 2,4 млрд теңгеге 291 жоба қаржыландырылды. Бұл бағыттағы жұмыстар әлі де жалғасуда. Оның ішінде 24 ауыл шаруашылығы кооперативі 605,6 млн теңгеге несиелендірілді. Сонымен қатар, 61 жұмыс орнын ашу көзделген. Ал биыл жоба аясында 5,6 млрд теңгеге 305 жобаны іске асыру көзделуде, – дейді бөлім басшысы.

«Ауыл аманаты» жобасының мақсаты – ауыл тұрғындaрының әл-aуқaтын жaқсaрту. Бүгінде түрлі жобалар қолға алынып, кәсіп ашып, нәпақасын тауып жүргендердің де қатары қалың. «Балық емес, қармақ» ұстанымымен кәсіп ашып, оны дамытуға тың жобаларға беретін жеңіл несиенің жеңілдігі де орасан зор болып тұр. Әлбетте, халықты кәсіпке бағыттау бірнеше мәселені шешеді. Салық базасын ұлғайтады, жұмыссыздықпен белсенді күреседі және мұндай ортада қоғамдық ахуалдың да тұрақты болары анық.

«Жұмысы жоқтық, тамағы тоқтық – аздырар адам баласын» деген Абай өлеңіндегідей жұмыссыздықтың залалы көп. Демек, екі қолға бір күрек ұстап, мал табуда «Ауыл аманатының» берері мол екені өзін дәлелдеп келеді.

Дәулет ҚЫРДАН