Кітапхана түні… Рухани толысып, жан дүниеңе әлемнің бар байлығын жиятын түн. Иә, түнгі кітапханада жұмыстан кейінгі шаршауың да, әр нәрсені ойлап беймаза күй кешкенің де ұмытылып, кітап әлеміне еніп кетесің. Бір ғажабы, ой бөлісіп, айналадағыларды тыңдайсың. Иә, Сырдария ауданындағы Руханият орталығында өткен кітапхана түні керемет болды. Іс-шара биылдан бастап бекітілген 23 сәуір – «Кітапханашылар» және «Ұлттық кітап күні» қарсаңында өтті.
Тәжірибелі басшы Рүстембек Бәйділдаев бастаған орталық кітапхана ұжымы «Кітапхана түні» жобасын ең алдымен ұлы ақын Абай Құнанбайұлының шығармашылығынан бастады. Іс-шара барысында хәкім Абай Құнанбайұлының кітаптары, Мұхтар Әуезовтің «Абай жолы» романы кеңінен таныстырылды. Мектеп оқушылары әдеби көрініс көрсетіп, кемеңгердің ойлы, парасатты дүниелерінің құндылығын арттыра түсті. Өз кезегінде орталық кітапхананың директоры Рүстембек Бәйділдаев сөз сөйлеп, «Түнгі кітапхана» жобасының мән-мағынасын жұртшылыққа кеңінен айтып өтті.
– «Кітапхана түні» жобасы – кітап оқу мәдениетін жаңғыртуға, оқырман мен кітапхана арасындағы байланысты нығайтуға бағытталған маңызды бастама. Аталған жоба аясында біз оқырманға тек кітап ұсынып қана қоймай, рухани орта қалыптастыруды мақсат етеміз. Ұлы ойшыл Абай Құнанбайұлының шығармашылығы – ұлттық әдебиетіміздің алтын қазығы. Сондықтан жоба барысында Абай мұрасына ерекше назар аударылып, оның терең ойлары мен тағылымды сөздерін жас ұрпаққа кеңінен насихаттау көзделген. Ал қазақтың халық жазушылары мен ақындарының шығармаларын дәріптеу де – басты бағытымыздың бірі саналады. Бүгінде кітапханашылар қауымы – руханияттың шамшырағын жағып отырған жандар. Олардың еңбегі – ұлт мәдениеті мен әдебиетін сақтап, оны келешек ұрпаққа жеткізудегі маңызды бағыт екенін айта кеткім келеді. Осы орайда, жыл сайын 23 сәуір – «Ұлттық кітап күні» ретінде аталып өтіп, кітап пен оқырманға деген құрметтің арта түсуіне ықпал етіп келеді. Бұл жолы кітапханашылардың кәсіби мерекесін атап өтеміз. Жоба аясында ұйымдастырылып отырған «Замандастар» ток-шоуы – оқырмандар мен қоғам белсенділері арасында еркін пікір алмасуға мүмкіндік беретін алаң. Балалар кітапханасының жұмысы жанданып, жас оқырмандарды кітап оқуға баулу бағытында түрлі іс-шаралар өткізілуде. Кітап қорының толықтырылуы да тұрақты назарда. Жаңа әдебиеттермен қамтамасыз ету арқылы оқырман сұранысын қанағаттандыру – біздің негізгі міндеттеріміз. Жалпы, «Кітапхана түні» жобасы – кітапхана қызметінің жаңа форматта дамуына серпін беріп, қоғамда кітап оқуға деген қызығушылықты арттыратын тиімді алаң деп білеміз, – деді Рүстембек Бәйділдаев.
Кітапханашы Ләззат Серікбаева Абай Құнанбайұлының «Желсіз түнде жарық ай» әнін орындады.
Екінші бөлімде оқырман қауым поэзия бағында кездесіп, «Аузымен құс тістеген» ақындардың өлеңдерін тыңдады. Мәселен, үнемі кітапханамен байланысын үзбейтін жастар Нұрсұлтан Сүйіндіков Мұқағали Мақатаевтың «Адам қойған атымнан айрылмаймын» және Жанасыл Әбен Ұлықбек Есдәулеттің «Тұр бұрышқа» өлеңін оқыды. Бұдан кейін «Замандастар» ток-шоуында «Ең әдемі келіншек», «Біз де ғашық болғанбыз», «Қыз жиырмаға толғанда» атты пьесалардың авторы, Сыр елінің перзенті Сұлтанәлі Балғабаевтың «Қызыл сырнай» повесінің желісі талқыланды. Басты кейіпкердің өмір жолы баяндалып, шығарманың құрылымы кеңінен насихатталды.
Іргелі ұжымның негізгі құрылымдарының бірі – балалар кітапханасы. Мұнда кішкентай бүлдіршіндер ғарыш әлеміне саяхат жасады. Бүлдіршіндерге шат-шадыман көңіл күй сыйланып, балалар әдебиетіне шолу жасалды. Оқырман қауым жасанды интеллект мүмкіндіктерін саралап, тың жобаның артықшылығына қанықты. Кітапхана қорындағы құнды кітаптармен танысып, фантастика әлемін тамашалады. Кітапхана әдіскері Раушан Құлмахова бастаған барлық бөлім меңгерушілері мен кітапханашылар «Кітапхана түні» жобасының сәтті өтуіне тікелей атсалысты.
Бұл ретте кітапхананың тұрақты оқырмандары Мектепхан Елеусінов, Жадыра Әкімтаева, Гүлзат Оразалиева секілді бірнеше азамат мән-мағынасы зор кештің өткізілу барысы жөнінде пікір білдіріп, ұйымдастырушыларға алғыс айтты.
– Кітапханаға кешкі уақытта келіп, еркін форматта түрлі іс-шараларға қатысу – оқырман үшін жаңа әрі қызықты мүмкіндік екен. «Замандастар» ток-шоуы да өте әсерлі өтті. Қатысушылардың еркін пікір алмасуы, өз ойларын ашық жеткізуі – жастар үшін үлкен тәжірибе. Балалар кітапханасының жұмысы да назардан тыс қалмағаны байқалады. Жас оқырмандарға арналған іс-шаралар олардың кітапқа деген қызығушылығын арттырары сөзсіз. Кітап қорының жаңа әдебиеттермен толығып жатқаны да көңіл қуантады. Бұл – оқырман сұранысының ескеріліп отырғанының айғағы. «Кітапхана түні» жобасы – кітап оқуға деген қызығушылықты арттырып, қоғамда рухани құндылықтарды дәріптеуге бағытталған өте маңызды бастама деп есептеймін. Осындай игі іс-шара мен әдеби кеш алдағы уақытта да жалғасын табады деп сенемін. Кітапханашылар қауымын кәсіби мерекесімен шын жүректен құттықтаймын, – деді Мектепхан Елеусінов.
«Qyrdan»—ақпарат