Қызылордаға спорт саласын басқаруға келген Бахтияр Артаевпен Сыр журналистерінің жүздессек деген арманы бүгін орындалды. Әсте, олар өңір спортындағы жаңалықтарды, әсіресе, кейінгі кезде көпті ойландырған «Қайсар» футбол клубының болашағы жайлы білгісі келген. Десек те, кездесуге асықпаған Артаев жылдың екінші айына өткен соң ғана уақыт тапты.

Алашқы сұрақты қойған «Qyzylorda» телеарнасының арнаулы тілшісі Әзиз Сейдалы тікелей эфирде өтетін «Өзекжарды» хабарына шақырғандағы Артаевтың «Мен арқылы рейтингті көтергілеріңіз келді ме?» деген қарсы сауалының мәнісін сұрады. Басқарма басшысымен сұхбат құрудың сәті түспей жүрген «Qazakhstan» телеарнасының өңірдегі меншікті тілшісі Әділбек Серікұлы, «Казахстанская правда» газетінің меншікті тілшісі Әлібек Байшүленовтер де осы мәселені көтерді.

– Сіз осы сұрағыңыз арқылы хайп жасап, рейтингіңізді көтердіңіз деп ойлаймын. Көзге көріне алмай жүрген журналистің қоятын сұрағын қойдыңыз. Мен өзіме хайп жинаудан аулақпын. Мен нақты бір жұмысты атқарайын, содан кейін ғана сұхбат беруге дайынмын, – деді Бахтияр Артаев.

Десек те, Артаев мырза таяуда ғана спорт журналисі Аслан Қаженовпен кездесіп, елдегі спорт саласындағы жетістіктерді айтыпты. Сонда Сырдағы журналистерді аттап өтіп, Арқадан келген қаламгерге сұхбат бергенді оңай көрді ме?!

Дәулет ҚЫРДАН,
Сурет автордікі.