Қазіргі таңда жасөспірімдер арасындағы құқық бұзушылық мәселесі қоғам үшін өзекті тақырыптардың бірі болып отыр. Жастар – елдің болашағы, сондықтан олардың тәрбиесі мен дұрыс бағытта қалыптасуы мемлекет пен қоғамның ортақ міндеті.
Осы мақсатта Қызылорда облысы Полиция департаменті облыстық дене шынықтыру, спорт және туризм басқармасымен бірлесіп, жасөспірімдер арасындағы құқық бұзушылықтардың алдын алу мақсатында облыс орталығындағы №5 облыстық олимпиадалық резервтің мамандандырылған балалар-жасөспірімдер спорт мектебінің оқушыларымен кездесу өткізді.
Іс-шараға Есірткі қылмысына қарсы іс-қимыл және Киберқылмысқа қарсы күрес басқармаларының қызметкерлері қатысты. Тәртіп сақшылары оқушыларға құқық бұзушылықтың алдын алу жолдарын түсіндіріп, заң алдындағы жауапкершілік туралы жан-жақты ақпарат берді.
Кездесу барысында буллинг, кибербуллинг, интернет қауіпсіздігі, лудомания, нашақорлық және зорлық-зомбылық секілді өзекті мәселелер қозғалды. Сонымен қатар есірткі айналымына қатысқаны үшін қарастырылған заң талаптары мен қылмыстық жауапкершілік шаралары кеңінен түсіндірілді.
Полиция қызметкерлері жас спортшыларға қолданыстағы заңнаманы түсіндіріп, құқық бұзушылықтың алдын алу бойынша профилактикалық кеңестер берді.
Жасөспірімдер арасында қауіпсіздікті арттыру, құқықтық сауаттылықты қалыптастыру және құқық бұзушылықтардың алдын алуға бағытталған кездесу еркін әрі ашық форматта өтті. Мұндай формат жасөспірімдердің өз ойын қысылмай жеткізуіне, құқықтық мәселелерді жақсы түсінуіне мүмкіндік берді. Әсіресе, күнделікті өмірде кездесетін жағдайлар, жауапкершілік түрлері және қауіпсіздік мәселелері қарапайым тілмен түсіндірілді. Еркін форматтағы әңгіме жастардың қызығушылығын арттырып, олардың белсенді қатысуына жол ашты. Нәтижесінде кездесу тек ақпарат берумен шектелмей, өзара сенім мен түсіністікке негізделген пайдалы диалог алаңына айналды.