Мал ұрлығын анықтау және оның жолын кесу мақсатында Қызылорда облысының Полиция департаменті жедел – профилактикалық шараларды жүйелі түрде жүргізіп келеді. Тексеріс жұмыстарынан бөлек бақташылармен де сөйлесіп, тиісті түсіндіру жұмыстарын жүргізуде.
Оларға мал ұрлығы жасалған жағдайда қандай жаза қолданылатындығын түсіндіріп, тиісті ережелер жазылған жадынама қағаздар таратты.
Жайылымдағы малдарға мұқият болып, оқыс оқиғалар орын алған жағдайда дереу «102» арнасы арқылы полиция қызметкерлеріне хабар беру туралы түсіндірме жұмыстарын жүргізіп келеді.
Жыл басынан атқарылған жұмыстардың нәтижесінде мал ұрлығын жасаған
8 қылмыскерден құралған 2 топ құрықталды.
Профилактикалық іс-шаралар барысында полицейлер еркін жайылымнан жеті жылқыны ұрлаудың жолын кесті. Рейд барысында 19 қаңтар күні Арал ауданы Жақсықылыш ауылының шетінде полицейлер УАЗ автокөлігін тоқтатып, тексеру кезінде көлік бортында тиісті құжаттары жоқ 4 жылқы табылды. Бұдан әрі жедел-тергеу әрекеттерін жүргізу барысында жылқылардың жайылымнан ұрланғаны анықталды. Бұл жөнінде Тоқабай ауылындағы мал иесінің өзі хабарсыз болған.
Тінту барысында полиция қызметкерлері күдіктілерден тағы екі жылқы, сондай – ақ жылқы етін тәркіледі. Осылайша қаскөйлер жәбірленушіге 3 млн 140 мың теңге көлемінде шығын келтірді.
Бұдан бөлек күдіктілерден Желмая маркалы мотоцикл және басқа да заттай дәлелдемелер алынды. Ұсталған 33 және 25 жастағы екі облыс тұрғынына қатысты қылмыстық іс қозғалып, сотқа дейінгі тергеп – тексеру әрекеттері жүргізілді. Тергеу барысында күдіктілер қамауға алынды. Тергеп – тексеру нәтижесі бойынша іс сотқа жолданды.
Қазіргі уақытта сот шешім шығарды. Сот үкімімен айыпталушылар мал ұрлығы үшін кінәлі деп танылып, 3 жыл мерзімге бас бостандығынан айырылды. Ұрланған мал иесіне қайтарылды.
«Мал ұрлықтарының алдын алу және ашу бағытында атқарылып жатқан жұмыстар ауқымды. Тұрақыт түрде түсіндіру жұмыстары жүргізіліп, мал базарлары мен ет өнімдерін сататын орындар, мал сою цехтары үнемі тексеріледі» дейді Қызылорда облысы Полиция департаментінің Криминалдық полиция басқармасының бастығы полиция подполковнигі Қанат Өсербай.