Қазақ ішсе сусын, жесе тағам, мінсе көлік болған төрт түлікті атакәсіп еткен. Байырғы дағдыдан ажырамай, шаруашылық ісін жүйелі жүргізіп келе жатқан жұрт Сырдарияда жетерлік. Аудан әкімі Берік Сәрменбаевтың төрағалығымен өткен жиында төрт түлікті түгендеп, мал ауруларының алдын алу мәселесі көтерілді. Мәжіліске ауылдық округ әкімдері, мекеме және бөлім басшылары қатысты.
Сырдария ауданында биыл эпизоотияға қарсы 12 түрлі аса қауіпті ауруларға қарсы ветеринариялық-профилактикалық іс-шаралар жоспары бекітіліп, 3 айға жоспарланған көрсеткіш 100 пайызға орындалды. Бұл туралы аудандық ветеринариялық стансасының басшысы Нұрлыбек Дәулетбаев баяндады. Станса басшысының айтуынша, ауыл шаруашылығы жануарларын энзоотиялық ауруларына қарсы профилактикалық шаралар жүргізу мақсатында 6 түрлі ауруға қарсы ветеринариялық іс-шаралар жоспары бекітіліп, жоспарға сәйкес ветеринариялық-профилактикалық шаралар толық орындалған.
Жиында мұнан бөлек, көктемгі егін егу жұмыстарының жүргізілуі жайлы да тақырып тіні тарқады. Аталған мәселе бойынша аудандық ауыл шаруашылығы және жер қатынастары бөлімінің басшысы Бағлан Мейрамбекұлы баяндама жасап, биылғы егілетін ауыл шаруашылығы дақылдарының көлемі, олардың құрылымы және суармалы жерлерді тиімді пайдалану жоспарлары туралы тоқталды.
– Биыл ауданда 32064 гектарға егін орналастыру жоспарлануда. Оның ішінде, күріш дақылы 17 000 гектарға егілетін болады. Бүгінгі күні ауыл шаруашылығы құрылымдарында жалпы 4585 гектар ақ егіс егілді. Биылғы егіске 5000 тонна күріш тұқымы құйылып, қазіргі таңда 3289 тоннасы себу дәрежесіне жеткізілді. Осы жылы ауданда егісті әртараптандыру бойынша 2000 гектарға жүгері дақылын егу жоспарлануда, – деді Бағлан Мейрамбекұлы.
Шаруаларға жеңілдетілген бағамен берілетін дизель отынының көлемі 2 825 тонна болса, оның 1 015 тоннасын, яғни 36 пайызы «Жібек жолы ЛТД», «РК Мұнай» компаниялары арқылы әр литрі 281 теңгеден (нарықтағы баға 325 теңге) шаруашылық құрылымдарына жеткізілуде. Ал «Қазсушар» РМК облыстық филиалымен 117 шаруашылық келісімге отырған.
– Қашыртқылар, каналдарды тазалау, гидротехникалық құрылыстарды жөндеу жұмыстары бойынша ішкі су жолдарының 200 000 текшеметр (95 %) топырақ шығарылып, 13 дана (100,0%) гидротехникалық құрылыс, 48 дана (100,0%) су тартатын қондырғылары жөнделді. 2026 жылы аудан бойынша 2000 гектарға жүгері дақылын егу жоспарлануда. Бүгінгі таңда шарушылықтар нақты 725 гектарға жүгері дақылын егуге дайындығын бастады. («Шаған жер» ЖШС 505 га, «Ақжарма и К» ФҚ 200 га, «Тұмар» ЖК 20 га). Қостанай облысындағы «Манай агро» ЖШС тұқым шаруашылығы мекемесінен жүгері тұқымын сатып алуға келісім-шартқа отырды. Тұқым сәуір айының 20-на дейін жеткізілетін болады. Жүгерінің пионер, лимагрейн сорттары егілмек, – дейді Б.Мейрамбекұлы.
Әкімдік отырысында қосымша мәселелер де қаралды. Атап айтқанда, МӘМС, мерзімді әскерге шақыру және санитарлық тазалық бойынша тапсырмалар жүктелді.