Мемлекет басшысы еліміздің дамуын жаңа деңгейге көтеру бағытында 2026 жылды «Цифрландыру және жасанды интеллект жылы» деп жариялады. Осыған орай бүгін аудан әкімі Жандос Еркінбектің төрағалығымен кезекті жиын өтті. Күн тәртібінде экономика салаларында жасанды интелектіні енгізу мәселелері талқыланды.
Аудан басшысы: «Президентіміз елімізді бәсекеге қабілетті мемлекет ретінде дамыту үшін Үкіметке экономиканың барлық салаларына жаппай жасанды интеллектіні енгізіп, жұмысымызды жаңаша тәсілмен жүргізуді тапсырды. Бұл тапсырма аудан деңгейінде де сапалы ұйымдастырылуы тиіс»,- деп атап өтті.
Жасанды интеллект дағдыларын дамыту мен қолданудағы маңызды басым міндеттердің бірі — кадрлардың біліктілігін арттыру. Осы мақсатта ауданымызда «IT Park Qarmaqshy» филиалын ашу жоспарлануда. Бұл жүйелі бастама жастардың цифрлық дағдыларын дамытып, жаңа технологияларды меңгеруге мүмкіндік беретін болады.
Мәжіліс барысында аудан бойынша көркейту-көгалдандыру, санитарлық тазалық жұмыстары және кент, ауылдық округтердегі арнайы техникалардың жай-күйі бойынша аудан әкімінің орынбасары Самат Смағұлов баяндама жасап, қазіргі атқарылған жұмыстарға тоқталып өтті. Сондай-ақ Конго-Қырым геморрагиялық қызбасының алдын алу шараларына санитариялық-эпидемиологиялық бақылау басқармасының басшысы Әлия Идрисова баяндама жасаса, жазғы кезеңде суға шомылу маусымына дайындық бағытында аудандық төтенше жағдайлар бөлімінің бастығы Өмірбек Сақтабаев сөйлеп, қауіпсіздік ережелерін атап өтті.
Жиын қорытындысы бойынша Жандос Еркінбек барлық жауапты сала басшыларына күн тәртібіне сәйкес тапсырмалар жүктеп, орындалуын тұрақты бақылауда ұстауды қатаң тапсырды.
Қармақшы ауданы әкімінің баспасөз қызметі