Жоғары оқу орнын грант негізінде бітіріп, мамандық бойынша жұмыс істемесе, мемлекеттің сол шәкіртті оқытуға кеткен шығынын шәкірттің өзі қайтарады. Мұндай деректерге қанықпыз. Тіпті, айналамызда жүр. Ал алдағы уақытта университетті ақылы негізде оқып, мамандығына сай жұмыс таба алмаған жастар оқу орнын немесе министрлікті сотқа беріп, шығынын қайтаруы мүмкін. Бұл – бүгінгінің мәселесі.

ҚР Парламенті Мәжілісінің депутаты Дәулет Мұқаев жиында осы мәселені көтерді.

– Жатақхана, тамағын, барлық шығынын есептегенде төрт жылда 10 млн теңге кетеді. Төрт жыл бойы осылай оқып, табан тоздырып білім алады. Бірақ бітірген соң жұмыс таппайды. Университет оқуға түсетін кезде таудай уәдені үйіп-төгіп береді. Тәжірибеде ақшасын қайтару жөнінде университетті сотқа берген жағдай кездесті ме? – деді Мұқаев ҚР Ғылым және жоғары білім министрі Саясат Нұрбекке.

Ал министр өздерінің тараптарынан маман тапшылығын зерттеп жатқанын жеткізді.

– Біз сауалнама алып тұрамыз. Онда елдегі әрбір кәсіпорыннан зейнетке шығатын, ауысатын, тағы сондай жағдайларды зерделеп, мәлімет дайындалады.