Нартай Бекежанов атындағы Қызылорда облыстық қазақ академиялық музыкалық драма театрының биылғы алғашқы премьерасы Островскийдің «Найзағай» драмасынан басталды.

Драмадан бұрын әуелі брифинг өтті. Брифинкке Ғ.Мүсірепов атындағы Мемлекеттік академиялық балалар мен жасөспірімдер театрының режиссері, халықаралық, республикалық фестивальдердің лауреаты Дина Жұмабаева, Қазақстанның еңбек сіңірген қайраткері Залипа Төлепова  және  мәдениет саласының үздігі Сырым Әбдіразақов қатысты. Режиссер Дина Жұмабаева қойылым жайлы және дайындық барысындағы қызықты оқиғалармен бөлісті. Ол әйел тақырыбындағы қойылымдарды неліктен жиі таңдайтынын айтты.

– Мен өзім әйел болғандықтан, бұл тақырып маған өте жақын және әйел тағдырын іштей сезінемін. Сондай-ақ, комедия жанрына баруға қорқамын. Себебі қолыннаң келмейтін істі жасағаннан, қолыннан келетін іспен айналысқан дұрыс деп санаймын, – деді режиссер.

«Найзағай»  – үміт пен арманға толы нәзік жанның жүрекжарды тарихы. Жарық пен ерік-жігерді армандайтын жас әйел бостандыққа ұмтылады.  Алайда оның жолы ауыр шешімдермен толығып, қатал күндерге әкеп соғады. Бұл жол оның жан дүниесіне жазылмас жара салды. Өмірдің қатал сынағы оған рухани ауыртпалық әкелгенімен, жаңа күш пен жігер табуына әсер ете ала ма?

Қала тұрғындарының өнерге деген көңілі ерекше. Қанша дегенмен, ұлт театрының ту тіккен жері ғой. Премьераға келген қонақтар залдың ішін лық толтырды. Бізге алдын ала бекітілген орын да бұйырмады. Бір үміт пен бір күдік көкейде. Үмітіміз – театрлық қойылымдарға елдің ықыласының артқаны. Күдігіміз – ұлт  ұстазы Ахметтің тілімен айтқанда, халықтың көзі, құлағы, һәм тіліне айналған БАҚ өкілдеріне деген құрметтің аздығы.

Қойын дәптерін қолына ұстап, тікесінен тік тұрып, қойылым жайлы ойларын түртіп алғандар да болды… Осылайша ақпараттандыруға келген БАҚ өкілі ретінде соңғы қатардан бір-ақ шықтық.

Тоғжан КАМАЛ,
Гүлжайна ӘБДІЛЛАЕВА ,
Қожа Ахмет Ясауи атындағы
Халықаралық қазақ-түрік
университетінің студенттері
(Сурет театрдың әлеуметтік желідегі парақшасынан алынды)