Сырдария – ең әуелі көгалдағы хоккеймен аты шыққан аудан. Мұнда спорттың барлық түрі бар. Бірақ облыс бойынша аталған спорт түрінде шоқтығы биік. Негізін салған Сұлтан Қобландиннің есімі бүгінде елге таныс. Әлбетте, көгалда хоккей ойнаудан топ жарған ауданның басқа спорт түрлерінен де алары мол. Бүгінде өңірдегі спорт саласында бұқаралық спортты дамыту қолға алынса, аталған істе Сырдария тағы да көш бастап келеді.
Ауданда дене шынықтыру мен спортты дамытудың негізгі көрсеткіші ол – тұрақты дене шынықтыру және спортпен шұғылданушылар санын ұлғайту. Бұқаралық спортты дамытудың негізгі жолы – спорттық жарыстарды көптеп өткізіп, халықты спортқа тарту.
– Аудандық дене тәрбиесі, спорт және туризм бөлімінің, жалпы халықты дене шынықтыру және спортқа тарту жолында дене шынықтыру және спорт мекемелері – 2 спорт мектебі, 1 спорт клубы, 1 балалар-жасөспірімдер дене тәрбиесі даярлығы клубы жұмыс жасайды. Жастарға спортты жанына серік ету арқылы дені сау ұрпақ ретінде қалыптастырып қана қоймай, тәрбиелі әрі саналы жастардың қатарын арттыруға септігін тигізеді. Жастарымыз спортпен шұғылдануы үшін ең бірінші кезекте спорт нысандары да, халыққа қолжетімді деңгейде болуға тиісті. Мәселен, қазіргі таңда ауданымызда екі стадион (Тереңөзек кенті және Н.Ілясов ауылы), 6 спорт кешен (Тереңөзек кенті – 2, Ақжарма – 1, Н.Илясов – 1, Шаған ауылы – 1, Бесарық ауылы – 1), 30 спорт зал, 18 жапсарлас спорт зал, 74 жазықтық құрылғылар жұмыс істейді. Барлық дене шынықтыру және спорт нысандары саны 130-ды құрайды. Аталған спорт нысандар тегін негізде қызмет көрсетеді, – дейді Сырдария аудандық дене тәрбиесі, спорт және туризм бөлімінің басшысы Марат Ерташов.
Дене шынықтыру және спорт саласында 218 штаттық қызметкер жұмыс істейді. Соның ішінде, дене шынықтыру білімі бары – 217 қызметкер. Аудан бойынша 17 жылпы білім беру мектебі бар. Барлық дене шынықтыру пәні мұғалімдерінің саны – 131, соның ішінде жоғарғы білімі бары – 126, арнаулы орта білімі бары – 5.
Дене шынықтыру және спорт секцияларына жалпы барлығы – 555 дене шынықтыру – сауықтыру және спорттық үйірмелер жатады. Оларға ауыр атлетика, баскетбол, бокс, волейбол, қол добы, дзюдо, еркін күрес, жеңіл атлетика, көгалдағы хоккей, таеквондо, үстел теннисі, футбол, белбеу күресі, гір спорты, дойбы, қол күрес, кіші футбол, шахмат, асық ату, бес асық, қазақ күресі, тоғызқұмалақ, грэпплинг, панкратион, каратэ-до, самбо, көпсайыс сияқты спорт түрлерімен шұғылданады. Аудан бойынша 2026 жылдың 3 айында — 42 дене шынықтыру және спорттық іс – шаралар өткізіліп, оған 3449 қатысушы тартылды. Жыл басынан бері аудан бойынша Қазақстан Республикасының чемпионатынан аудан спортшылары, соның ішінде жас спортшылар жоғарғы дәрежедегі нәтижелер көрсетуде.
– Айта кететін болсақ, каратэ спортынан наурыз айында Қарағанды қаласында каратэ-WKF спортынан Қазақстан Республикасының чемпионаты өтті. Ауданымыздың жас спортшысы Ернар Уалиханов жүлделі ІІІ орын иеленді. Жаттықтырушысы Салтанат Мырзабекованың еңбегі ерен. Панкратион спортынан Қызылорда қаласында өткен ҚРЧ-дан Алихан Балғабай І орынның биігін бағындырса, Нұржігіт Мейрамбеков ІІ орынды еншіледі. Нұртөре Сабыржанов, Қуат Марат, Мирас Алтынбеков, Зиналғабиден Кеңесов үздік үштікті түйіндеді. Еркін күрес спортынан Ақтау қаласында жастар арасында Қазақстан Республикасының көктемгі чемпионаты өткізілді. Жерлесіміз Инабат Нұрадинқызы жүлделі ІІ орынды еншісіне алды. Ауданда мұндай жетістіктер жетерлік, – дейді Марат Ерташов.
Аудан көлемінде топ жарып, республикада даңқын асырып жүрген спортшылар жетерлік. Олардың әрбірінің жеңісі үшін тұтас аудан бөркін аспанға атып жүр.
– Ауданымызда волейбол спорты күн санап дамып келеді. Ерлер волейбол спортынан 2025 жылдың «Жазғы балалар Азия чемпионатының» жеңімпазы Ержігіт Айбекұлы биыл да Орал қаласында өткен ерлер арасындағы жоғарғы лигасының ІІІ орын иегері атанды. Жаттықтырушысы Айбек Сейпуловтың төккен тері аз емес. Әйелдер волейболынан әйелдер арасындағы жоғарғы лигасы Павлодар қаласында өткізіліп, ауданымыздың жас спортшылары Нұрайым Айбекқызы, Ақнұр Кенжебай, Жанбибі Төлегенова І орын иеленіп, Қазақстан Республикасының чемпионы атанды. Жаттықтырушысы Жандос Темірғалиевтың ерен еңбегін ел көріп отыр, – дейді бөлім басшысы.
– Ересектер арасында ауданымыздың даңқын шығарып жүрген ардагер спортшымыз, аудандық спорт клубының жаттықтырушысы – Раимкулова Эльмира Сәрсенбекқызы. Қарағанды қаласында ақпан айында жеңіл атлетикадан жабық кешенді әуесқойлар және ардагерлер арасында V Қазақстан Республикасының чемпионаты өткізіліп, жерлесіміз жүлделі ІІІ орынды иеленді, – деді мақтанышын білдірген ол.
Көк туды көкке көтерер спорт саңлақтарының арасында сырдариялықтардың үлесі қомақты. Бүгінде өңірдегі спортты одан әрі дамыту үшін қарқынды тірлік атқарылуда.
Аян СПАНДИЯР