Таяуда Қармақшы ауданында облыста алғаш рет аудандар арасынан «IT Park Qarmaqshy» филиалы ашылған еді. Заманауи ғылым мен білім – әрине, бүгінгі жастың азығы. Әсіресе, жасанды интеллекті мен цифрландыру өрістеген кезеңде қоғам үшін бұл тың серпін екені анық. Аудандар арасынан алғаш боп ашылған филиалдың болашағы қандай? Мүмкіндіктері жеткілікті ме? Осы бағытта жастар ресурстық орталығының Қармақшы аудандық филиалының директоры Нұржұман Пірназаровпен сөйлескен едік.

– Нұржұман Пірназарұлы, мұндай орталық өңірдегі аудандар арасынан алғаш болып Қармақшы ауданында ашылып отыр. Мүмкіндіктеріңіз қандай?

– Мемлекет басшысы биыл 2026 жылды Цифрландыру және жасанды интеллект жылы деп жариялады. Бұл бастама – осы арнаулы жылдың жемісі. Сөзіңіздің жаны бар, «IT Park Qarmaqshy» филиалы аудандар арасынан тек бізде ашылған соң, мүмкіндік туралы сұрақ қоюыңыз орынды. Біз алдағы уақытта 300-ге жуық жасты жасанды интеллект, цифрландыру бағыттары бойынша оқытамыз. Барлығы тегін. Бұл бағытта арнаулы әлеуметтік жоба жарияланып, сол бойынша жұмыс істейтін боламыз. «Жасанды интеллект – болашақ бастауы: жастардың цифрлық сауаттылығы мен жаңа дағдыларын қалыптастыру» атты мемлекеттік әлеуметтік жоба әзірленген. Қазіргі таңда жоба бойынша мемлекеттік сатып алу рәсімдері жүргізілуде.

– Мүмкіндіктеріне тоқталсақ…

– Жастар бұл жерде сайт жасауды, робототехниканы үйренеді. Егер жақсы нәтиже беріп жатса, қаржыландыру көлемі де ұлғая бермек. Аудан әкімі Жандос Еркінбекұлы жемісті нәтижеге қол жеткізіп жатсақ, қаржыландыруды да молайтатынын ерекше атап өтті. Биыл бір лот жарияланып, сол бойынша бастама хабтар, турнирлер мен байқаулар өтеді. Жеңімпаздар облысқа жолдама алады. Одан бөлек, тың бастамалар мен жақсы жобалар болса, университеттердің гранттары да бөлінеді. Аудан әкімі жиында «Бұл – аудан жастары үшін үлкен мүмкіндік. Егер жастарымыздың жаңа идеялары болса, осы орталық оны дамытуға, жүзеге асыруға көмектесетін алаңға айналады. Қармақшыдан шыққан жас таланттарымыз ертеңгі күні әлемдік деңгейдегі IT-алпауыттардың қатарында жүрсін деп тілеймін» деп сенім білдірді. Бұл сенім бізге күш береді.

– Құрал-жабдықтармен, керек-жарақпен қамтамасыз етілген бе?

– «Руханият» орталығында орналасқан «IT Park Qarmaqshy» кабинеті толық техникалық қажеттіліктермен қамтамасыз етіліп, 12 дербес компьютермен жабдықталған. Жыл көлемінде кемінде 300 жасты қамтып, арнайы оқу курсынан өткен қатысушыларға сертификаттар табысталады. Мұнда келіп, компьютерлік сауатын арттырып, жаңа бағдарламалар үйренемін деп қолдануына ешқандай кедергі жоқ.

– Орталықты аштық. Маман жеткілікті ме?

– Ия, әрине. Бұл мәселе орталықты ашар сәтте алдымен назарға алынатын іс қой. Қазіргі таңда орталықтың бір қызметкері бар және қоғамдық негізде тағы бір қызметкермен қамтамассыз етілген. Алдымен, сол екі маманды оқытып, дайындайды.

– Филиалдың болашағынан не күтесіз?

– Алдағы уақытта 300 жасты оқытамыз деген жоспар бар. Бұл – бір жылдық жоспар. Оның 150-200-і білім алып шықса, аудан үшін үлкен жетістік. Цифрландыру мен жасанды интеллектіге байланысты көп үміт күтеміз. Қарапайым ғана алаяқтықпен айналысатын сайттардың ара жігін ажыратып, оған ұрынып қалмаудың жолын білгеннің өзі – үлкен сабақ. Аудан жастарының цифрландыру бағыты бойынша білім алса, кейін арнайы бағдарламалар жасақтауды меңгерсе, біз үшін үлкен мәртебе. Бағдарлама жасай алатын қабілетті жастарды дайындап, оларды шетелге де шығарғымыз келеді. Мұның бәрі жай ғана жоспар емес, айқын мақсат.

– Жақсы жобалар бар ма? Бұл жерден мықты боп, өзін дәлелдеген жастар қайда барады?

– Цифрландыру бойынша әлеуметтік жобалар қолдау табады. Стартап жобалар туралы айтуға болады. Кеше олардың біразы ІТ-park-тың ашылуында да көрсетілді. Жастар ресурстық орталығы, Оқушылар үйі және білім бөлімінің «AMANAT» партиясымен бірлескен Стартап жобалар байқауы қолға алынбақ. Осы жұмыс ары қарай да жалғасын таба бермек.

– Сұқбатыңызға рақмет.

Әңгімелескен Дәулет ҚЫРДАН