Қызылорда облысы Полиция департаменті, Арал ауданы полиция бөлімінің учаскелік полиция инспекторы полиция капитаны Сағнаев Ержан Әділетұлы ішкі істер органдарында 2018 жылдан бері қоғамдық қауіпсіздікті қамтамасыз ету бағытында қызмет атқарып келеді.

Қоғам тыныштығын күзету үшін уақытпен санаспай қызмет ететін учаскелік инспекторлар күнделікті тұрмыстық жағдайдан бастап, ауыр қылмыстарға дейінгі оқиғалардың бел ортасында жүретін әмбебап мамандар. Олардың еңбегі ел тыныштығының берік кепілі.

Күн сайын таңғы сағат 08:00-де басталатын қызмет барысында инспекторлар нұсқаулық алып, өздеріне бекітілген аумақта қоғамдық тәртіпті қадағалауға кіріседі.

Оның негізгі міндеттері – құқық бұзушылықтың алдын алу, тұрғындармен жұмыс жүргізу, есепте тұрған азаматтарды бақылау және заң талаптарының сақталуын түсіндіру. Бұл қызмет үнемі жоғары жауапкершілікті талап етеді.

Учаскелік полиция инспекторы көше тәртібін бақылап қана қоймай, тұрғындардың өтініштеріне жедел әрекет етеді. Қандай да бір жағдай болса, бірінші болып жететін де солар.

Сол күнгі кезекшілік барысында қандай да бір құқық бұзушылық тіркелген жоқ. Ең бастысы аудан тыныштығы мен қоғамдық тәртіп сақталды.

Учаскелік полиция инспекторының күнделікті еңбегі көзге көп көріне бермегенімен, ел тыныштығы мен қауіпсіздікті қамтамасыз етудегі маңызы зор.