Еңбекке баулу – жас ұрпақты өмірге бейімдейтін, еңбекке құрмет пен жауапкершілікке тәрбиелейтін маңызды пәндердің бірі. Бүгінде технология дамып, қоғам сұранысы өзгерген сайын бұл пәннің де мазмұны жаңарып, заман талабына бейімделуі қажет екені айқын сезілуде. Себебі мектеп қабырғасында қалыптасқан еңбек дағдысы баланың болашақтағы кәсіби бағытына, өмірлік ұстанымына тікелей әсер етеді.
Осы бағыттағы өзекті мәселелер мен тың ұсыныстар дөңгелек үстелде кеңінен талқыланды. Жалпыұлттық социал-демократиялық партиясының облыстық филиалы ұйымдастырған жиынға білім саласының мамандары мен технология пәнінің мұғалімдері қатысып, еңбекке баулу пәнін жетілдіру жолдары жөнінде пікір алмасты.
Кездесу барысында мамандар бұл пәннің тек қосымша сабақ емес, оқушыны өмірге икемдейтін маңызды бағыт екенін ерекше атап өтті. Әсіресе қазіргі қоғамда техникалық және қолданбалы мамандықтарға сұраныс артып отырған тұста, мектептегі еңбекке баулу сабақтарының рөлі айрықша маңызға ие болып отыр.
Жиында пәннің практикалық бағытын күшейту қажеттігі сөз болды. Ұлдар мен қыздарды оқыту тәсілін бағыттарға қарай ұйымдастыру, оқушылардың қызығушылығына сай дағдыларды терең меңгерту мәселелері көтерілді. Мұғалімдердің пікірінше, бұл тәсіл балалардың қабілетін ашып, нақты кәсіпке бейімделуіне мүмкіндік береді.
Сонымен қатар, пәнге бөлінетін уақыт көлемін арттыру жайы да қозғалды. Себебі еңбекке баулу – тек теориямен шектелмейтін, тәжірибені талап ететін сабақ. Сондықтан апталық сағат санын көбейту арқылы оқушылардың шеберлігін шыңдап, шығармашылық қабілетін дамытуға жол ашылмақ.
Дөңгелек үстелде мектеп шеберханаларын жаңғырту мәселесі де назардан тыс қалмады. Заманауи құрал-жабдықтармен қамтылған оқу кабинеттері балалардың техникаға қызығушылығын арттырып қана қоймай, олардың еңбекке деген ынтасын күшейтетіні айтылды. Әсіресе ауыл мектептеріндегі материалдық базаны жетілдірудің маңызы зор екені ерекше атап өтілді.
Мамандар сондай-ақ оқу бағдарламасын жаңартып, оған инженерлік ойлау, техникалық сауаттылық және кәсіпкерлік негіздерін енгізу қажеттігін жеткізді. Бұл бастама оқушылардың ертеңгі еңбек нарығына бейімделуіне және болашақ мамандығын саналы таңдауға ықпал етпек.
Жиын қорытындысында еңбекке баулу пәнінің сапасын арттыруға бағытталған бірқатар ұсыныстар әзірленді. Атап айтқанда, пәннің мазмұнын жетілдіру, оқу жүктемесін көбейту, шеберханаларды кезең-кезеңімен жаңарту және технология пәні мұғалімдерінің біліктілігін арттыру мәселелері көтерілді.
Қорыта айтқанда, еңбекке баулу – жас ұрпақты еңбекке тәрбиелейтін, өмірге бейімдейтін маңызды пән. Сондықтан оны заман талабына сай дамыту, мазмұнын байытып, сапасын арттыру – келешек үшін жасалатын маңызды қадамдардың бірі.
ЖСДП Қызылорда облыстық филиалының баспасөз қызметі