Көне ғимаратты жаңғыртып, кейінгіге алып қалу – тарихқа үлкен құрмет. Қармақшы ауданындағы тарихи нысандардың бірі теміржол вокзалының күрделі жөндеуі – өткенге салауат айтқан ұрпақтың ірі істерінің бірі.
Аудан әкімі Жандос Еркінбек бірқатар нысандарды аралап, атқарылған жұмыстарды пысықтау барысында әуелгі қадамды осы күрделі жөндеудің жайынан бастады. Құрылыс жұмыстарының сапасын көрді. Қазіргі таңда 1904 жылы салынған тарихи ғимаратты жаңғырту жұмыстары қарқынды жүргізілуде. Жоба аясында ішкі және сыртқы әрлеу, инженерлік жүйелерді жаңарту, аумағын абаттандыру және жолаушыларға қолайлы жағдай жасау бағытындағы жұмыстар атқарылуда.
Бүгінде нысандағы күрделі жөндеу жұмыстарының басым бөлігі орындалған. Осы бағытта аудан әкімі жауапты мердігер мекеме өкілдеріне құрылыс сапасын қатаң бақылауда ұстап, жұмыстарды белгіленген мерзімде әрі талапқа сай аяқтауды тапсырды.
Сонымен қатар Жосалы кентіндегі Дендропарк аумағының санитарлық тазалық және көркейту-көгалдандыру жұмыстарының барысы бақыланды. Мұнда Жандос Еркінбек тазалық жұмыстарының сапалы орындалуына және берілген тапсырмалардың кемшіліксіз атқарылуына ерекше назар аудару қажеттігін атап өтті.