Қоғалыкөл ауылдық клубында қоғам қайраткері Ғани Мұратбаевтың 125 жылдығына арналған «ЖАРЫҚ ЖҰЛДЫЗ» атты аудандық жазба ақындар мүшәйрасы жоғары деңгейде өтті. Тағылымды шара Сырдария аудандық мәдениет және тілдерді дамыту бөлімінің қолдауымен, Қоғалыкөл ауылдық округі әкімі аппараты және «Қоғалыкөл ауылдық клубы» коммуналдық мемлекеттік қазыналық кәсіпорнының ұйымдастыруымен өткізілді.
Мәдени-рухани кештің басты мақсаты — жас ақындардың шығармашылық қабілеттерін шыңдау, ұлттық руханиятты дәріптеу, поэзияға деген қызығушылықты арттыру және жас қаламгерлерге қолдау көрсету болды.
Салтанатты шараның ашылуында Ғани Мұратбаевтың өмірі мен өнегелі жолы кеңінен насихатталып, арнайы бейнеролик көрсетілді. Сонымен қатар ұлттық нақыштағы көрме ұйымдастырылып, әсем би қойылымдары мен музыкалық сүйемелдеулер кештің көркін аша түсті.
Жыр додасына ауданның талантты жас ақындары қатысып, екі кезең бойынша бақ сынады. Алғашқы кезеңде қатысушылар Ғани Мұратбаевқа арналған арнау өлеңдерін оқыса, екінші кезеңде еркін тақырыптағы шығармаларын көпшілік назарына ұсынды. Байқауға ұсынылған туындылардың авторлық төл шығарма болуы және бұрын жарияланбауы талап етілді.
Мүшәйраға аудандық мәдениет үйі мен ауылдық округтерден келген жас талапкерлер қатысты. Атап айтқанда, Айдарова Айжан, Балманова Акерке, Айтбаев Бақтөре, Мұхиятдинов Ержан, Асанова Гүлжазира, Батырбек Диана, Қарақат Оразова, Сүйіндіков Нұрсұлтан және Опабеков Биболат өз өнерлерін ортаға салды.
Кеш барысында Қоғалыкөл ауылдық округі әкімі аппаратының бас маманы Әбибуллаев Бақытжан сөз сөйлеп, жас ақындарға сәттілік тіледі.
Өнер додасына әділ бағасын берген қазылар алқасының құрамында ақын Байрон Есенбаев, аудандық мәдениет үйінің әдіскері Әуезова Айгүл Әмірбекқызы және ауылдық әйелдер кеңесінің төрайымы Рахима Алдашқызы болды. Қазылар қатысушылардың өлең мазмұны мен көркемдігіне, тақырыптың ашылуына, ақындық шеберлігі мен тіл байлығына, ұлттық құндылықтарды насихаттауына және сахна мәдениетіне ерекше мән берді.
Мүшәйра қорытындысы бойынша І орын Шаған ауылынан келген жас ақын Балманова Акеркеге бұйырды. ІІ орынды жерлес ақын Ержан Мұхиятдинов иеленсе, ІІІ орынды Аманкелді ауылынан қатысқан жас талант Қарақат Оразова мен Кент клубының қатысушысы Айдарова Айжан өзара бөлісті. Жеңімпаздар арнайы дипломдармен және сыйлықтармен марапатталды.
ЖАРЫҚ ЖҰЛДЫЗ» жазба ақындар мүшәйрасы жас таланттардың шабытын шыңдап, ұлттық поэзияның қадір-қасиетін дәріптеген мазмұнды рухани кешке айналды. Мұндай тағылымды шаралар жас буынның әдебиетке деген сүйіспеншілігін арттырып, ел руханиятының дамуына үлес қоса беретіні сөзсіз.