Қармақшы ауданында газдандыру ісі қарқынды жүргізіліп келеді. Аудан орталығына таяқ тастам жердегі қос ауылда жұмыс қызу. Жаз ортасында жоба аяқталып, халық көгілдір отынның игілігін көреді деп күтілуде.
Қос ауылдың бірі – Төребай би. «Төребай би ауылына газ құбыры мен кварталішілік газ тарату желілерін салу» жобасы биылғы наурыз айында басталған. Мердігер мекеме берген ақпаратқа сәйкес шілденің алғашқы он күндігінде қолданысқа беріледі.
Жоба құны – 479 517,0 мың теңге. Төрт айда тиянақты жұмыс жүргізіп, мердігер мекеме «Asia story KZ» ЖШС халықтың батасын алады. Әрине, толық сараптама өткізіліп, бекітілген мекеме қабылдап алған жағдайда. Аталған жобаның авторлық қадағалаушысы – «Grand Structure Engineering» ЖШС.
«Ағымдағы жылы республикалық бюджет есебінен 140 000,0 мың теңге қаржы бөлінген. Қазіргі уақытта аталған қаржының 75 000,0 мың теңгесі игерілді. Осы жоба барысында 21,26 км полиэтиленді газ құбыры, 16,0 метр болат (сталь) құбыры жүргізілетін болады. Бүгінгі күнде орташа қысымды 10 000 метр, елді мекен ішіне 1 дана ШРП, төмен қысымды 4500 метр газ құбыры жүргізілді. Жалпы жоба бойынша 98 тұрғын үйге газ нүктесін орнату қарастырылған. Осы күні 45 тұрғын үйге газ нүктесі орнатылған», – дейді әкімдіктегілер.
Газ құбыры тартылып жатқан екінші елді мекен – Иіркөл. «Қызылорда облысы Қармақшы ауданы Иіркөл ауылына газ құбыры мен кварталішілік газ тарату желілерін салу» құрылыс – монтаж жұмыстары жобасы 16 наурызда басталған. Мердігер мекеме «Aral Qurylys» ЖШС жұмысты бас-аяғы төрт айда бітіреміз деп отыр. Жоба құны – 378,9 мың теңге. Бұл жоба бойынша авторлық қадағалаушы – «Grand Structure Engineering» ЖШС. Ал техникалық қадағалаушы – «Жаңа ғасыр-К» ЖШС.
«Ағымдағы жылы республикалық бюджет есебінен 110 000,0 мың теңге қаржы бөлінді. Осы жоба барысында 15,88 км полиэтиленді газ құбыры, 389,0 метр болат (сталь) құбыры жүргізілетін болады. Бүгінгі күні, 4,5 км полиэтиленді газ құбыры жүргізіліп, болат (сталь) құбыры жүргізілмеген. Сонымен қатар, нысан басына орташа 160 мм құбырдан – 5500 метр, 110 мм құбыр – 1150 метр, 90 мм құбыр – 1000 метр, 63 мм құбыр – 1150 метр және қосалы заттарымен бірге әкелінді. Нысан басында 2 экскаватор, 1 тиегіш, 2 камаз жүк көлігі жұмыс жасауда», – дейді әкімдіктегілер.
Бүгінде Қармақшы ауданы экономикалық тұрғыдан қарқынды дамуда. Халықтың тұрмыс-тіршілігі де оң бағытқа ойысқан. Көгілдір отынға қосылып, табиғи газдың игілігін көріп отырған ауылдар аз емес. Бұйыртса, қос ауылдың тұрғындары да сол қатарға қосылып, отын жарып, күл шығару бейнетінен арылмақ.
Аян СПАНДИЯР