Қармақшы ауданында көркейту-көгалдандыру жұмысы қарқынды жүзеге асырылып келеді. Бүгінде аудан орталығындағы көшелер гүлзар баққа айналғандай. Қартайған ағаштардың орнын көкке бағыт алып, түзу өскен шыбықтар басқан. Гүлденген кент орталығына қарап, көз сүйсінерліктей.
Аумағы 6780 гектарды құрайтын кентте бүгінде 4483 тұрғын үйде 21 мыңнан астам халық өмір сүруде. Халыққа қолайлы әрі жайлы орта қалыптастыру-мемлекет пен жергілікті атқарушы органдардың негізгі міндеттерінің бірі. Осы бағыттағы маңызды жұмыстардың бірі – көгалдандыру.
Жасыл желек елді мекеннің экологиялық ахуалын жақсартып, ауадағы шаң-тозаңды азайтуға, тұрғындардың денсаулығына оң әсерін тигізеді.
Жосалы кентіндегі көше бойына егілген талдардың басым бөлігінің жасы 50 жылдан асқан. Уақыт өте келе дарақтанып өскен ағаштар көшенің көркін төмендетіп қана қоймай, электр желілері мен газ құбырларына да кері әсерін тигізе бастаған. Осыған байланысты көше бойындағы талдарды жасарту және жаңа көшеттер отырғызу жұмыстары қолға алынды.
– Аудан әкімінің қолдауымен 2024 жылдан бастап тұзды жерге төзімді ағаш түрлерін отырғызу тәжірибесі енгізілді. Алғашқы кезде бұл бастамаға күмәнмен қарағандар да болды. «Бұған дейін көк шықпаған жерге ағаш өсе ме?» деген пікірлер айтылды. Алайда, заманауи тәсілдер мен жүйелі жұмыстың нәтижесінде бұл бастама өз тиімділігін көрсетті. 2024 жылдың сәуір айынан бастап Қорқыт ата, Аманкелді және Тәуекелов көшелеріне клен, катальпа, туя секілді ағаш көшеттері отырғызылды. Жұмыстың нәтижелі болуы 2025 жылы Абай көшесі, Жасыл белдеу аумағы мен саябақтарды көгалдандыру жұмыстарын жалғастыруға мүмкіндік берді. Сонымен қатар өткен күзде Ү.Томанов көшесінің бойындағы топырақ өңделіп, егілген көшеттерді малдан қорғау мақсатында арнайы ағаш қоршаулар орнатылды, – дейді тиісті сала мамандары.
2026 жылдың сәуір айында Рысқұлов, Томанов көшелері мен саябақ аумақтарына қосымша көшеттер егілді. Егілген ағаштардың шығымын арттыру үшін тыңайтқыш беріліп, тұрақты суару жұмыстары жүргізілуде.
Қолда бар мүмкіндіктерді тиімді пайдалану мақсатында тамшылатып суару әдісі де қолданылуда.
Жүргізілген жүйелі жұмыстардың нәтижесінде бүгінде егілген көшеттердің 90 пайызы көктеп, өсіп келеді.
Бұл-Жосалы кентін жасыл желекке айналдыру бағытындағы жұмыстың нақты нәтижесі.