Еркеназ Амангелді,
№45 «Ақ Орда» мектеп-гимназиясы
6 сынып оқушысы.
Жетекшісі:Ахметова С.М.
Шиелі ауданы

 Құрметті, жас буын, дос-жаран және барша қазақ бауырларым!
Сіздерге арналған үндеуімді мұқият оқып, көңілдеріңізге тоқып алыңыздар!

Адам үшін ең қымбат байлық – өмір мен денсаулық. Ал есірткі сол байлықты ұрлайтын, адамның тағдырын тәлкекке салатын ең қауіпті удың бірі. Ол – өмірді тұманға айналдырып, арманды ұрлайды, отбасын күйретеді, болашақты жояды.

Өкінішке орай, кейбір жандар сол өмірдің шырағын өз қолымен өшіріп, есірткінің торына түсіп жатады. Есірткі – тек ағзаны улап қоймайды, жанды да, тағдырды да улайды. Біреу у алып келіп, іш десе не істер едің? Әрине, бас тартасың. Удан қалай қорықсаң, есірткіден дәл солай сескен!

Бүгінгі ұрпақ – ертеңгі елдің тірегі. Біз бірге қоғамымызды есірткі атты қатерден қорғауымыз керек. Әрбір азамат тек өз денсаулығы үшін ғана емес, отбасының бақыты мен елінің болашағы үшін жауапты екенін ұмытпайық!

Ендеше, өмірді таңда! Өмірге – «ИӘ», ал есірткіге – «ЖОҚ» деп айт! Өйткені сенің өмірің – сенің ең қымбат байлығың! Жарқын болашақты бірге қалыптастырайық!

Есің барда елің тап,
Есірткіден бол, аулақ.