Қадірлі достарым!
Бүгінгі таңда қоғамның ең өзекті мәселелерінің бірі – есірткіге тәуелділік. Бұл індет тек жеке адамның ғана емес, тұтас ұлттың болашағына қауіп төндіретіні анық. Есірткі – уақытша ләззат сыйлағанымен, оның артында өмірді күл-талқан ететін қайғы мен өкініш жатады. Сондықтан да әрбір адам «Есірткісіз өмір – ғажайып!» деген ұстанымды жүрегіне түйіп, салауатты өмір салтын таңдауы тиіс.

Есірткінің азғындыққа, қылмысқа және денсаулықтың нашарлауына алып келетінін бәріміз білеміз. Ол адамды рухани тұрғыда әлсіретіп, отбасының берекесін бұзады. Бір сәттік қызығушылықтың соңы – өмір бойы өкінішке айналуы мүмкін. Сондықтан жастарды дұрыс бағытқа, спорт пен өнерге, білім мен еңбектің қадірін білуге тәрбиелеу – біздің ортақ міндетіміз.

Мектептерде  «Салауатты өмір салты – болашақтың кепілі» атты тәрбие сағаттары өткізіледі. Мұның бәрі жастардың санасына есірткісіз өмірдің шынайы құндылығын сіңіруге бағытталған.

Есірткісіз өмір – таза сана, мықты денсаулық, бақытты отбасы және жарқын болашақ. Әрбір жас өз өмірінің қожайыны екенін ұмытпауы керек. Өмірдің шынайы ғажайыбы – таза оймен, биік мақсатпен, адал еңбекпен өмір сүруде.

Рамазан БИСЕН,
№37 мектеп-лицейдің 10 сынып оқушысы.
Сырдария ауданы.