Санжар ЖАМБЫЛ,
№44 орта мектептің
7 Б сынып оқушысы.
Сырдария ауданы

Нұрлан ата-анасын тыңдамайтын. Ол мектепке кеттім деп, айдалада бұзақы балалармен бірге уақыт өткізетін. Ата-анасы оған қанша айтқанымен, құлақ аспады. Ұстаздары тәртіпке шақырайын десе, мектептің есігінен сығаламайтын. Ал сыныптас достарының да Нұрланға жаны ашитын.

Уақыт өте келе есейіп қалған Нұрлан қасындағы бұзақы балалармен бірге есірткіге әуестене бастады. Мектепке келмегені былай тұрсын, үйіне де қонбайтынды шығарды. Енді істің насырға шапқанын түсінген ата-анасы оның сыныптас достарын шақырды.

– Балалар, көмектерің керек. Достарыңды құтқарыңдаршы, – деді.

Балалар іске кірісіп кетті. Нұрланды іздеп тауып, бұзақы балалардың үйінен алып шықты. Балалардың ішінде ата-анасы жоқ, өзі әжесінің қолында тәрбиеленетін Аян бар еді.

– Нұрлан, егер менің ата-анам болғанда сен тәрізді жүрмес едім. Қолғанат болар едім. Барында ата-ананың қадірін біл, – деді ол.

Нұрлан ата-анасы мен ұстаздарының және сыныптас достарының алдында кешірім сұрап, түзу жолға қайта түсті. Ол әлгі жолдың қиын әрі қысқа болатынын түсінді.

Есірткі адамды жояды. Есірткіге жоқ де, салауатты өмір салтын ұстан. Өйткені, біз – Қазақстанның болашағымыз.